മങ്കട: താഴെ അരിപ്ര മുതല്‍ നാട്ടുകല്‍ വരെയുള്ള ഭാഗങ്ങളിലെ റോഡിന്റെ വീതി കൂട്ടുന്നതിന്റെ ഭാഗമായി മങ്കട മണ്ഡലത്തിലെ താഴെ അരിപ്ര മുതല്‍ അങ്ങാടിപ്പുറം വരെയുള്ള കൈയേറ്റം ഒഴിപ്പിക്കല്‍, ജങ്ഷന്‍ നവീകരണം, കള്‍വര്‍ട്ട് നിര്‍മാണം, വിപുലീകരണം എന്നിവ നടത്തുമെന്ന് ദേശീയപാത വിഭാഗം ഉദ്യോഗസ്ഥര്‍ അറിയിച്ചു.
മങ്കട ബ്ലോക്ക് പഞ്ചായത്തില്‍ ടി.എ അഹമ്മദ് കബീര്‍ എം.എല്‍.എയുടെ അധ്യക്ഷതയില്‍ ചേര്‍ന്ന യോഗത്തില്‍ തിരൂര്‍ക്കാട്, അങ്ങാടിപ്പുറം ഭാഗങ്ങളില്‍ ബസ് ബേ, ജങ്ഷന്‍ നവീകരണം എന്നിവ നടപ്പാക്കാനും ധാരണയായി. ഇതിന്റെ ഭാഗമായി റോഡുകളിലെ കൈയേറ്റം ഒഴിപ്പിക്കും. മക്കരപ്പറമ്പ് ബൈപ്പാസ് നിര്‍മാണത്തിന്റെ പ്രവൃത്തിക്കുള്ള നടപടികള്‍ ഉടന്‍ തുടങ്ങും. ഇതിന്റെ ഭാഗമായി മണ്ണ് പരിശോധന ആരംഭിച്ചിട്ടുണ്ട്.
ജനവാസകേന്ദ്രങ്ങളും ടൗണുകളും ഒഴിവാക്കി അലൈന്‍മന്റ് എടുക്കാന്‍ എം.എല്‍.എ നിര്‍ദേശം നല്‍കി. 2019 ലെ പദ്ധതിയില്‍ കൂട്ടിലങ്ങാടി, അങ്ങാടിപ്പുറം ഓരാടംപാലം എന്നിവ പുതുക്കി പണിയുന്നതിന് ദേശീയ പാത വകുപ്പ് ഉറപ്പ് നല്‍കിയതായി ഉദ്രോഗസ്ഥര്‍ പറഞ്ഞു. എ.എക്.സി കെ.എം ബീവി ജാന്‍, എ.ഇ പി.ടി മുഹ്‌സിന്‍, വി.ശ്രീരാജ് പങ്കെടുത്തു.