ആറ്റിങ്ങല്‍: നിയന്ത്രണം വിട്ട ലോറി നിര്‍ത്തിയിട്ട കാറിലിടിച്ച് കടയിലേക്ക് പാഞ്ഞുകയറി ഒരാള്‍ മരിച്ചു. അഞ്ചുപേര്‍ക്ക് പരുക്ക്. ആറ്റിങ്ങല്‍ ടി.ബി ജങ്ഷന്‍ തുണ്ടുവിള വീട്ടില്‍ രാജു (52) ആണ് മരിച്ചത്. കൊല്ലം ചവറ തെക്കുംഭാഗം സ്വദേശിയും കാര്‍ ഡ്രൈവറുമായ സോനു (38), ആറ്റിങ്ങല്‍ മിഷന്‍ മുക്ക് സ്വദേശികളായ മധു, ചന്ദ്രന്‍, എന്നിവരെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ഇന്നലെ വെളുപ്പിന് നാലരയോടെ ആറ്റിങ്ങലിനു സമീപം ടി.ബി മുക്കിലാണ് അപകടം. ചവറയില്‍ നിന്ന് തിരുവനന്തപുരം എയര്‍പോര്‍ട്ടില്‍ ആളെ കൂട്ടികൊണ്ട് വരാന്‍ വന്ന കാര്‍ ചായക്കടക്ക് സമീപം നിര്‍ത്തി ചായകുടിക്കുന്നതിനിടയില്‍ അതെ ഭാഗത്തുനിന്നെത്തിയ ലോറി കാറിനെ ഇടിച്ചുനീക്കി തെരുവ് വിളക്ക് തൂണും തകര്‍ത്തു കടയില്‍ ഇടിച്ചു കയറുകയായിരുന്നു.ലോറി നിയന്ത്രണം വിട്ടു വരുന്നത് കണ്ടു കടയുടെ മുന്നിലുണ്ടായിരുന്നവര്‍ ഓടിമാറിയതിനാല്‍ വന്‍ദുരന്തം ഒഴിവായി. നാട്ടുകാരും ഫയര്‍ ഫോഴ്‌സും ചേര്‍ന്ന് പരുക്കേറ്റവരെ താലൂക്ക് ആശുപത്രിയിലും തിരുവനന്തപുരം മെഡിക്കല്‍ കോളജിലുമെത്തിച്ചു. ലോറി ഡ്രൈവറെ പൊലിസ് കസ്റ്റഡിയിലെടുത്തു.