തിരുവനന്തപുരം: മുഖ്യമന്ത്രിയുടെ പൈലറ്റ് വാഹനമിടിച്ച് നാല് യൂത്ത് കോണ്‍ഗ്രസ് പ്രവര്‍ത്തകര്‍ക്ക് പരുക്കേറ്റ സംഭവത്തില്‍ ഉത്തരവാദികളായ പൊലിസ് ഉദ്യോഗസ്ഥര്‍ക്കെതിരേ നടപടിയെടുക്കണമെന്നാവശ്യപ്പെട്ട് യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേത്യത്വത്തില്‍ ക്ലിഫ് ഹൗസിലേക്ക് മാര്‍ച്ച് നടത്തി.മാര്‍ച്ച് ദേവസ്വബോര്‍ഡ് ജങ്ഷനില്‍ പൊലിസ് തടഞ്ഞു. പ്രവര്‍ത്തകര്‍ ബാരിക്കേട് തകര്‍ത്ത് തള്ളിക്കയറാന്‍ ശ്രമിച്ചു. തുടര്‍ന്ന് മുഖ്യമന്ത്രിയുടെ കോലം കത്തിച്ചു. മാര്‍ച്ച് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യക്കോസ് ഉദ്ഘാടനം ചെയ്തു.
കേരളത്തിന്റെ മണ്ണില്‍ കരിങ്കൊടി കാണിച്ചാല്‍ ആ പ്രവര്‍ത്തകന്‍ ജീവന്‍ വെടിയേണ്ട സ്ഥിതിയാണുള്ളതെന്ന് ഡീന്‍ കുര്യക്കോസ് പറഞ്ഞു. ഉദ്യോഗസ്ഥര്‍ക്കെതിരേ നടപടിയെടുത്തില്ലെങ്കില്‍ കരിങ്കൊടികാട്ടിയുള്ള പ്രതിഷേധം തുടരുമെന്നും അദ്ദേഹം കൂട്ടിച്ചേര്‍ത്തു.