തുറവൂര്‍: ചേര്‍ത്തല താലൂക്കിന്റെ വടക്കന്‍മേഖല കേന്ദ്രീകരിച്ച് മയക്കുമരുന്ന് മാഫിയാ സംഘവും സെക്‌സ് റാക്കറ്റ് സംഘവും  വിലസുന്നു.
സൈക്കിളില്‍ ലോട്ടറി ടിക്കറ്റ് വില്‍പ്പനയുടെ മറവിലാണ് മയക്ക് മരുന്ന് വില്‍പന പലരും നടത്തുന്നത്. അരൂര്‍, എഴുപുന്ന, കോടീതുരുത്ത്, കുത്തിയതോട്, തുറവൂര്‍, പട്ടണക്കാട്, വയലാര്‍, കടക്കരപ്പള്ളി, അരുക്കുറ്റി, പാണാവള്ളി, തൈക്കാട്ട്‌ശേരി എന്നി പഞ്ചായത്തുകളുടെ പരിധിയിലുള്ള സ്ഥലങ്ങളിലാണ് വ്യാപകമായി മയക്ക് മരുന്ന് വില്‍പന നടത്തി വരുന്നത്.
സ്‌കൂള്‍, കോളേജ് വിദ്യാര്‍ഥികള്‍, തൊഴിലാളികള്‍, ബസ് സ്റ്റോപ്പുകള്‍, റെയില്‍വേ സ്റ്റേഷന്‍ പരിസരങ്ങള്‍, സ്‌കൂള്‍ പരിസരങ്ങള്‍ എന്നിവിടങ്ങളില്‍ എത്തിയാണ് രഹസ്യമായി മയക്ക് മരുന്ന് വില്പന നടത്തുന്നത്. എഴുപുന്ന സ്വദേശിയായ ഒരാളാണ് ഇതിന്റെ പിന്നിലെന്നും ഇയാള്‍ മയക്കുമരുന്നു ചേര്‍ത്ത ആയുര്‍വേദ മരുന്നും വില്പനയും നടത്തുന്നുണ്ടെന്നും പറയപ്പെടുന്നു. എത്തേണ്ട ഉദ്യോഗസ്ഥര്‍ക്ക് കൃത്യമായി മാസപ്പടി എത്തുന്നതിനാല്‍ മാഫിയാസംഘത്തെ പിടികൂടാന്‍ ഇക്കൂട്ടര്‍ തയാറാവുന്നില്ലെന്ന് നാട്ടുകാര്‍ പറഞ്ഞു.
അനധികൃത റിസോര്‍ട്ടുകളും ഗ്രാമീണ മേഖലകളിലെ വീടുകള്‍ കേന്ദ്രീകരിച്ചുമാണ് പെണ്‍വാണിഭ സംഘങ്ങള്‍ പ്രവര്‍ത്തിക്കുന്നത്. പള്ളിത്തോട്ടിലെ ഒരു പ്രമുഖനാണ് ഇതിനെല്ലാം ഒത്താശ ചെയ്യുന്നതെന്നും ഇയാള്‍ക്ക് ഭരണതലത്തില്‍ നല്ല സ്വാധീനമുള്ളതിനാല്‍ പലരും സത്യാവസ്ഥ തുറന്നുപറയാന്‍ തയ്യാറാകുന്നില്ല. രാഷ്ട്രീയ കക്ഷികളിലും സര്‍ക്കാര്‍ തലത്തിലും ഉന്നത സ്വാധീനമുള്ളതിനാല്‍ ഇവരെ പിടികൂടിയാല്‍ തന്നെ നിമിഷങ്ങള്‍ക്കകം കേസെടുക്കാതെ വിട്ടയ്ക്കുകയാണ് പതിവ്. തുറവൂറില്‍ സെക്‌സ് റാക്കറ്റില്‍പ്പെട്ട യുവതികള്‍ ഇരുചക്രവാഹനത്തിലാണ് വിലസി നടക്കുന്നത്.