മലപ്പുറം: സംസ്ഥാനത്ത് കായിക വകുപ്പിന്റേയും ഇതര വകുപ്പുകളുടേയും കീഴിലുള്ള സ്റ്റേഡിയങ്ങളുടെ നിർമാണവും പരിപാലനവും നടത്തുന്നതിനായി രൂപീകരിച്ച സ്‌പോർട്‌സ് കേരള ഫൗണ്ടേഷൻ(എസ്.കെ.എഫ്) പ്രവർത്തിക്കുന്നത് രണ്ട് സ്ഥിരം ജീവനക്കാരെ വച്ച്.  ഇതിൽ ജോലിചെയ്യുന്ന114 ജീവനക്കാരിൽ 112 പേരും താൽക്കാലികക്കാർ  ആണെന്നതാണ് കൗതുകരം. 
ചീഫ് എൻജിനീയർ, ചീഫ് ഓപ്പറേറ്റിങ് ഓഫിസർ, എക്‌സിക്യൂട്ടീവ് എൻജിനീയർ അടക്കം 33 തസ്തികളാണ് എസ്.കെ.എഫിലുള്ളത്. ഇതിൽ ഒരു ക്ലർക്കും ഒരു ജൂനിയർ സ്‌പോർട്‌സ് ഓർഗനൈസറും മാത്രമാണ് സ്ഥിരം ജീവനക്കാരായുള്ളത്.

ശേഷിക്കുന്നവരിൽ 95 പേർ കരാർ ജീവനക്കാരാണ്. ഇവരിലാണ് ഫിനാൻസ് മാനേജരും  മുഴുവൻ എൻജിനീയർമാരും ഉൾപ്പെടുന്നത്. 12 പേർ ദിവസ വേതനത്തിലും ജോലി ചെയ്യുന്നു. അഞ്ച് ശുചീകരണ തൊഴിലാളികൾ പാർട്ട് ടൈം ജീവനക്കാരുമാണ്.
സംസ്ഥാനത്തെ സ്റ്റേഡിയങ്ങളുടെ നിർമാണം, നിലവിലുള്ളവയുടെ നവീകരണം, കായിക വകുപ്പിന്റെ അധീനതയിലുള്ള സ്‌പോർട്‌സ് സ്‌കൂളുകളിലെ അടിസ്ഥാന സൗകര്യങ്ങളുടെ നടത്തിപ്പ്, ഇവയുടെ പരിപാലനം തുടങ്ങിയവയാണ് സ്‌പോർട്‌സ് കേരള ഫൗണ്ടേഷൻ നിർവഹിക്കുന്നത്.

കായിക എൻജിനീയറിങ് വിഭാഗത്തിൻ്റെ  എല്ലാ പ്രവർത്തികളും ഏറ്റെടുത്ത് നടത്തുന്നതും ഫൗണ്ടേഷനാണ്. 
കിഫ്ബി ധനസഹായത്തോടെ നിർമിക്കുന്ന മുഴുവൻ ജില്ലാ സ്‌റ്റേഡിയങ്ങളുടേയും അറ്റകുറ്റപ്പണി അടക്കം  നിർവഹിക്കുന്നതും സ്‌പോർട്‌സ് കേരള ഫൗണ്ടേഷനാണ്. സംസ്ഥാനത്തെ കായിക മേഖലയുമായി ഇത്തരത്തിൽ ബന്ധപ്പെട്ട കിടക്കുന്ന ഒരു സ്ഥാപനത്തിൻ്റെ  പ്രധാന തസ്തികളിൽ പോലും സ്ഥിരം ജീവനക്കാരില്ലെന്നതാണ് വസ്തുത.