തിരുവനന്തപുരം: ബജറ്റ് ചോർന്നിട്ടില്ലെന്ന് ചീഫ് സെക്രട്ടറിയുടെ റിപ്പോർട്ട്. ഭരണഘടനാ ചട്ടങ്ങളുടെ ലംഘനം ഉണ്ടായിട്ടില്ലെന്നും റിപ്പോർട്ടിൽ പറയുന്നു. റിപ്പോർട്ട് ചീഫ് സെക്രട്ടറി സർക്കാറിന് സമർപ്പിച്ചു.
വിഷയത്തിൽ ചീഫ് സെക്രട്ടറി അന്വേഷണം നടത്തി കഴമ്പില്ലെന്ന് കണ്ടെത്തിയതായി മുഖ്യമന്ത്രി സഭയെ അറിയിച്ചു. അതിനിടെ , അടിയന്തരപ്രമേയത്തിന് അനുമതി നിഷേധിച്ചതിൽ പ്രതിഷേധിച്ച് പ്രതിപക്ഷം സഭയുടെ നടുത്തളത്തിറങ്ങി. വി.ഡി സതീശൻ എം.എൽ.എ ആണ് നോട്ടിസ് നൽകിയത്. ബഹളത്തെ തുടർന്ന് സഭ താത്ക്കാലികമായി നിർത്തി വെച്ചു.
സ്പീക്കർ കക്ഷി നേതാക്കളുമായി ചർച്ച നടത്തുകയാണ്.
മാധ്യമ പ്രവർത്തകർക്ക് നൽകാൻ നേരത്തെ തയ്യാറാക്കിയ ബജറ്റ് ചുരുക്കമാണ് ചോർന്നതെന്ന് നേരത്തെ ധനമന്ത്രി തോമസ് ഐസക്ക് സഭയിൽ വിശദമാക്കിയിരുന്നു. സമാന സംഭവങ്ങൾ നേരത്തെയും ഉണ്ടായിട്ടുണ്ടെന്നും ഇതിൽ നികുതി നിർദ്ദേശങ്ങളില്ലെന്നുമായിരുന്നു അദ്ദേഹത്തിന്റെ വിശദീകരണം.