ന്യൂഡൽഹി: വ്യാജ ഇ-പാൻ കാർഡ് (e-PAN Card) ഡൗൺലോഡ് ലിങ്കുകൾ അടങ്ങിയ ഇമെയിലുകൾക്കെതിരെ പൊതുജനങ്ങൾക്ക് മുന്നറിയിപ്പുമായി കേന്ദ്ര സർക്കാരിന്റെ ഫാക്ട് ചെക്ക് വിഭാഗമായ പി.ഐ.ബി (PIB Fact Check). ഉപഭോക്താക്കളുടെ വ്യക്തിഗത-സാമ്പത്തിക വിവരങ്ങൾ ചോർത്താൻ ലക്ഷ്യമിട്ട് നടക്കുന്ന ഫിഷിങ് തട്ടിപ്പാണിതെന്ന് അധികൃതർ വ്യക്തമാക്കി.

"ഡൗൺലോഡ് ഇ-പാൻ കാർഡ് ഓൺലൈൻ: ഒരു സ്റ്റെപ്പ്-ബൈ-സ്റ്റെപ്പ് ഗൈഡ്" (Download e-PAN Card Online: A Step-by-Step Guide) എന്ന വിഷയം (Subject) ചേർത്താണ് തട്ടിപ്പുകാർ ഇമെയിലുകൾ അയക്കുന്നത്. ആദായനികുതി വകുപ്പ് നൽകുന്ന ഇ-പാൻ കാർഡ് ഡൗൺലോഡ് ചെയ്യാനുള്ള ലളിതമായ വഴികൾ എന്ന വ്യാജേനയാണ് ഇമെയിൽ എത്തുന്നത്. ഇത്തരം സംശയാസ്പദമായ ലിങ്കുകളിലോ ഇമെയിലുകളിലോ ക്ലിക്ക് ചെയ്യരുതെന്നും, ഫോൺ കോളുകൾ, എസ്.എം.എസ് എന്നിവ വഴി രഹസ്യവിവരങ്ങൾ പങ്കുവെക്കരുതെന്നും പി.ഐ.ബി മുന്നറിയിപ്പ് നൽകുന്നു.

പാൻ കാർഡ് വിവരങ്ങൾ കൈമാറരുത്

ഇന്ത്യൻ ആദായനികുതി വകുപ്പ് നൽകുന്ന 10 അക്ക ആൽഫാ-ന്യൂമെറിക് (അക്ഷരങ്ങളും അക്കങ്ങളും ചേർന്ന) തിരിച്ചറിയൽ രേഖയാണ് പെർമനന്റ് അക്കൗണ്ട് നമ്പർ (PAN). ആദ്യത്തെ അഞ്ചക്ഷരങ്ങൾ, തുടർന്ന് വരുന്ന നാല് അക്കങ്ങൾ, അവസാനത്തെ ഒരു അക്ഷരം എന്നിങ്ങനെയാണ് പാൻ കാർഡ് നമ്പർ ക്രമീകരിച്ചിരിക്കുന്നത്.

സാമ്പത്തിക ഇടപാടുകൾക്ക് ഏറ്റവും അത്യാവശ്യമായ പാൻ കാർഡ് വിവരങ്ങൾ തട്ടിപ്പുകാർക്ക് ലഭിച്ചാൽ വലിയ സാമ്പത്തിക നഷ്ടത്തിന് സാധ്യതയുണ്ട്. അതിനാൽ ഔദ്യോഗിക വെബ്‌സൈറ്റുകൾ വഴി അല്ലാതെ വരുന്ന ഇമെയിലുകളെയും സന്ദേശങ്ങളെയും ജാഗ്രതയോടെ സമീപിക്കണമെന്ന് സർക്കാർ വ്യക്തമാക്കി.

The Central Government has issued an alert advising citizens to be cautious of fraudulent emails regarding e-PAN cards. Cybercriminals are using fake notices and phishing links to steal personal data and financial information. The government urges everyone not to click on suspicious links or download unverified attachments.