റിയാദ്: സഊദിയിൽ ജിദ്ദ കിങ് അബ്ദുൽ അസീസ് അന്താരാഷ്ട്ര വിമാനത്താവളത്തിൽ കണക്ഷൻ വിമാന യാത്രക്കാരനായ ഈജിപ്ത് പൗരന് കൊറോണ വൈറസ് ബാധ കണ്ടെത്തി. ഇതോടെ സഊദിയിൽ കോവിഡ് 19 കൊറോണ വൈറസ് ബാധിതരുടെ എണ്ണം 21 ആയി. ന്യൂയോര്‍ക്കില്‍ നിന്ന് ജിദ്ദ വഴി ഈജിപ്തിലേക്ക് പോവുകയായിരുന്ന ഈജിപ്ത് സ്വദേശിക്കാണ് രോഗം സ്ഥിരീകരിച്ചത്.

 

എയര്‍പോര്‍ട്ടിൽ യാത്രക്കാരുടെ ശരീര താപനില പരിശോധിക്കുന്ന തെര്‍മല്‍ നിരീക്ഷണ ക്യാമറയില്‍ ഇദ്ദേഹത്തിന്റെ  ഉയര്‍ന്ന താപനില ശ്രദ്ധയില്‍ പെട്ടതിനെ തുടര്‍ന്ന് നടത്തിയ പരിശോധനയിലാണ് വൈറസ് ബാധ സ്ഥിരീകരിച്ചത്. ഉടൻ എയര്‍പോര്‍ട്ടില്‍ വച്ചു തന്നെ ഐസൊലേഷനിലാക്കിയ യാത്രക്കാരനെ ജിദ്ദ ആശുപത്രിയില്‍ പ്രവേശിപ്പിച്ചു.

 

അതേസമയം, നേരത്തെ കണ്ടെത്തിയ കൊറോണ ബാധ സ്ഥിരീകരിച്ച 20 പേരിൽ 19 പേരുടെയും ആരോഗ്യ നിലയിൽ പുരോഗതിയുണ്ടെന്നും ഒരാളുടെ നില മാറ്റമില്ലാതെ തുടരുകയാണെന്നും സഊദി ആരോഗ്യ മന്ത്രാലയം അറിയിച്ചു. നാനൂറിലധികം പേർ ഐസൊലേഷനിലാണെന്നും രണ്ടായിരത്തിലധികം പേർ നിരീക്ഷണത്തിലാണെന്നും ഇന്ന് പുതിയ രോഗ ബാധയില്ലെന്നും മന്ത്രാലയ വക്താവ് ഇന്നലെ വാർത്താ സമ്മേളനത്തിൽ വ്യക്തമാക്കിയിരുന്നു.