കൊച്ചി: ലോക്‌സഭാ തെരഞ്ഞെടുപ്പില്‍ യൂത്ത് കോണ്‍ഗ്രസ് അഞ്ചുസീറ്റ് ആവശ്യപ്പെടുമെന്ന് സംസ്ഥാന പ്രസിഡന്റ് ഡീന്‍ കുര്യാക്കോസ് വാര്‍ത്താസമ്മേളനത്തില്‍ പറഞ്ഞു. യു.ഡി.എഫിന് അനുകൂലമായ സാഹചര്യമാണ് നിലവിലുള്ളത്. അതിനാല്‍ പരസ്പര ഒത്തുതീര്‍പ്പിന്റെ ഭാഗമായുള്ള സീറ്റ് വീതംവയ്ക്കല്‍ നടത്താതെ യുവാക്കളെ പരിഗണിക്കാന്‍ നേതൃത്വം തയാറാകണം. ഇക്കാര്യം കോണ്‍ഗ്രസ് ദേശീയ നേതൃത്വത്തെ അറിയിച്ചിട്ടുണ്ട്. ലോക്‌സഭയിലേക്കും നിയമസഭയിലേക്കും മാറിമാറി മത്സരിക്കുന്നവരില്‍ അനിവാര്യരല്ലാത്തവരെ ഇത്തവണ മാറ്റി നിര്‍ത്തണം.

യൂത്ത് കോണ്‍ഗ്രസ് പ്രവര്‍ത്തകരുടെ ആത്മാഭിമാനം കാത്തു സൂക്ഷിക്കുന്ന തീരുമാനം സംസ്ഥാന കോണ്‍ഗ്രസ് നേതൃത്വം കൈക്കൊള്ളും എന്നാണ് പ്രതീക്ഷ. സ്ഥാനാര്‍ഥി നിര്‍ണയം ദേശീയ നേതൃത്വം നിര്‍ദേശിച്ച മാനദണ്ഡങ്ങള്‍ അനുസരിച്ചു മാത്രമേ നടത്താവൂ. അല്ലാത്തപക്ഷം യൂത്ത് കോണ്‍ഗ്രസ് അതിനെ എതിര്‍ക്കും.
ഇറക്കുമതിയെന്നു തോന്നിക്കുന്ന ഒരു സ്ഥാനാര്‍ഥികളെയും അംഗീകരിക്കില്ല. മാര്‍ച്ച് ഒന്നിന് സംസ്ഥാന പ്രതിനിധി സമ്മേളനം നടത്തും. താന്‍ മത്സരിക്കുന്നത് സംബന്ധിച്ച് പാര്‍ട്ടി തീരുമാനിക്കുമെന്നും ഡീന്‍ പറഞ്ഞു.