കൊച്ചി: വെള്ളത്തിന്റെ ദുരുപയോഗം തടയാന്‍ കര്‍ശന നടപടികളുമായി ജില്ലാ ഭരണകൂടം. പൊതുടാപ്പ് ദുരുപയോഗം ചെയ്യല്‍, ഹോസുപയോഗിച്ച് ചെടി നനയ്ക്കല്‍, മുറ്റം നനയ്ക്കല്‍, നിര്‍മാണപ്രവര്‍ത്തനങ്ങള്‍ക്ക് ഉപയോഗിക്കല്‍, വാഹനങ്ങള്‍ കഴുകല്‍ എന്നിവ ശ്രദ്ധയില്‍പ്പെട്ടാല്‍ വാട്ടര്‍ സപ്‌ളൈ ആന്‍ഡ് സ്വിവറേജ് ആക്ട് പ്രകാരവും ഭേദഗതി 2008 പ്രകാരവും ശിക്ഷാനടപടികള്‍ സ്വീകരിക്കുമെന്ന് കലക്ടര്‍ അറിയിച്ചു.
പമ്പ് ഉപയോഗിച്ച് വെള്ളമൂറ്റല്‍, ഹോസുപയോഗിച്ച് കിണര്‍ നിറയ്ക്കല്‍, മറ്റ് അനധികൃത ഉപയോഗങ്ങള്‍ എന്നിവ ശ്രദ്ധയില്‍പ്പെട്ടാലും നിയമപ്രകാരം ശിക്ഷാനടപടികളുണ്ടാകും. പരാതികള്‍ സ്വീകരിക്കുന്നതിന് 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം സജ്ജമായിട്ടുണ്ട്.
കണ്‍ട്രോള്‍ റൂം എറണാകുളം നമ്പര്‍ 0484 2360369, മൂവാറ്റുപുഴ 0485 2832252 ടോള്‍ഫ്രീ നമ്പര്‍ 1800 42 55313. കുടിവെള്ള വിതരണം കാര്യക്ഷമമാക്കാനായി വാട്ടര്‍ അതോറിറ്റിയുടെ ബന്ധപ്പെട്ട ജീവനക്കാര്‍ മുഴുവന്‍ സമയവും പ്രവര്‍ത്തിക്കാന്‍ നിര്‍ദേശം നല്‍കിയിട്ടുണ്ടെന്നും എല്ലാവര്‍ക്കും ശുദ്ധജലം ഉറപ്പാക്കാനായി നിലവില്‍ ലഭിക്കുന്ന ജലം നീതിപൂര്‍വം ഉപയോഗിക്കണമെന്ന് കലക്ടര്‍ അഭ്യര്‍ഥിച്ചു.