പരപ്പനങ്ങാടി: വ്യാപാരികള്‍ക്കിടയില്‍ നിരാലംബരും നിരാശ്രയരുമായ കിടപ്പാടമില്ലാത്തവര്‍ക്ക് വീടുകള്‍ പണിതുനല്‍കാന്‍ ഭവനപദ്ധതിയുമായി വ്യാപാരികളും. പരപ്പനങ്ങാടി മര്‍ച്ചന്റ്‌സ് അസോസിയേഷന്‍ യൂത്ത് വിങ് ഘടകമാണ് സ്വപ്നക്കൂട് (വ്യാപാരിക്കൊരു വീട്)പദ്ധതിയുമായി മുന്നിട്ടിറങ്ങിയിട്ടുള്ളത്.
അസോസിയേഷന്‍ ആലപ്പുഴയില്‍ വച്ച് നടത്തിയ ശില്‍പ്പശാലയിലാണ് വിപുലമായ രീതിയില്‍ ഇത്തരത്തിലുള്ള ജീവകാരുണ്യ പ്രവര്‍ത്തനങ്ങള്‍ക്ക് രൂപം നല്‍കിയത്. വെല്‍ഫെയര്‍ ഫണ്ട് സമാഹരണം ജില്ലാ സെക്രട്ടറി അഷ്‌റഫ് ഷിഫ കുഞ്ഞാവാസ് അഷ്‌റഫിന് നല്‍കി തുടക്കം കുറിച്ചു. സ്വപ്നക്കൂട് പദ്ധതിയുടെ ലോഗോ പ്രകാശനം സംസ്ഥാന കമ്മിറ്റിയംഗം മലബാര്‍ ബാവഹാജി കെ മൊയ്തീന്‍കുട്ടി ഹാജിക്ക് നല്‍കി നിര്‍വഹിച്ചു. സ്വപ്നക്കൂട് പദ്ധതിയിലേക്കുള്ള രണ്ട് ലക്ഷം രൂപ ജന്നാത്ത് അഷ്‌റഫ് എം.വി മുഹമ്മദലിക്ക് നല്‍കി തുടക്കം കുറിച്ചു. എ.വി വിനോദ്, ദില്‍ദാര്‍ മുജീബ്, എം.വി ബാവഹാജി, ഇബ്രാഹിംഹാജി, എം.വി നൗഷാദ് നേതൃത്വം നല്‍കി.
പദ്ധതി ഭാരവാഹികള്‍: ജന്നാത്ത് അഷ്‌റഫ്(ചെയര്‍മാന്‍), സ്റ്റാര്‍ മുനീര്‍(കണ്‍വീനര്‍), കുഞ്ഞാവാസ് അഷ്‌റഫ്(ട്രഷറര്‍).