തേഞ്ഞിപ്പലം: വയലില്‍ തീ പടര്‍ന്നുപിടിച്ചതു കാരണം ഏക്കര്‍കണക്കിനു സ്ഥലത്തെ അടിപ്പുല്ലുകള്‍ അഗ്നിക്കിരയായി. ചേളാരി പാണക്കാട് അങ്ങാടിക്ക് സമീപം മദ്‌റസയ്ക്കു പിന്നിലുള്ള വയലില്‍ ഇന്നലെ രാവിലെ പതിനൊന്നിനാണ് സംഭവം.
വയലില്‍ കൂട്ടിയിട്ടിരുന്ന വൈക്കോലിനും തീപിടിച്ചു. നാട്ടുകാരും പ്രദേശവാസികളും ചേര്‍ന്നു മരച്ചില്ലകളും തെങ്ങിന്‍പട്ടകളും ഉപയോഗിച്ച് തീ അണയ്ക്കാന്‍ ശ്രമിച്ചെങ്കിലും വിഫലമായി. പിന്നീട് ഉച്ചയ്ക്ക് ഒന്നോടെ മീഞ്ചന്ത, തിരൂര്‍ എന്നിവിടങ്ങളില്‍നിന്ന് ഓരോ യൂനിറ്റ് ഫയര്‍ഫോഴ്‌സെത്തിയാണ് തീ നിയന്ത്രണവിധേയമാക്കിയത്. തീ പടര്‍ന്നു പിടിക്കാനുള്ള കാരണം വ്യക്തമല്ല.