പെരിക്കല്ലൂര്‍: വേനല്‍ കനത്തതോടെ കുടിയേറ്റ മേഖലയിലെ അതിര്‍ത്തി ഗ്രാമങ്ങളിലെ ക്ഷീരകര്‍ഷകര്‍ കന്നുകാലികളെ കൂട്ടത്തോടെ വിറ്റൊഴിക്കുന്നു. കുടിവെള്ളത്തിനും പച്ചപ്പുല്ലിനും ക്ഷാമമേറിയതോടെയാണ് പിടിച്ചുനില്‍ക്കാന്‍ കഴിയാതെ കര്‍ഷകര്‍ കന്നുകാലികളെ വിറ്റൊഴിക്കുന്നത്. അതിര്‍ത്തി ഗ്രാമങ്ങളില്‍ ചൂട് വര്‍ധിച്ചതും കബനിപുഴയും, കന്നാരും പുഴയും വറ്റിവരണ്ടതും ജലക്ഷാമത്തിന് കാരണമാകുന്നു. കുടിവെള്ളത്തിനായി ജനങ്ങള്‍ നെട്ടോട്ടമോടുന്ന അവസ്ഥയാണ്. മുന്‍വര്‍ഷങ്ങളില്‍ പുഴയോരത്തും പാടങ്ങളിലും കന്നുകാലികളെ തീറ്റയ്ക്കായി അഴിച്ചുവിടുകയായിരുന്നു പതിവ്. എന്നാല്‍, ഈ പ്രദേശമെല്ലാം വരണ്ടുണങ്ങിയതോടെ കാലികള്‍ക്ക് തീറ്റയുമില്ലാതായി. കൊളവള്ളി, സീതാമൗണ്ട്, കബനിഗിരി, കൃഗന്നൂര്‍, ചാമപ്പാറ, മരക്കടവ്, ചണ്ണോത്തുകൊല്ലി തുടങ്ങിയ പ്രദേശങ്ങളിലെല്ലാം ദിനംപ്രതി വരള്‍ച്ച രൂക്ഷമാവുകയാണ്. സാമ്പത്തിക പ്രതിസന്ധിയെ തുടര്‍ന്ന് ബാങ്കുകളില്‍ നിന്നും അയല്‍ക്കൂട്ടങ്ങളില്‍ നിന്നും വായ്പയെടുത്ത് ക്ഷീരമേഖലയിലേക്ക് തിരിഞ്ഞ കര്‍ഷകരാണ് ഏറെയും കാലികളെ വിറ്റൊഴിക്കുന്നത്. കനത്ത ചൂടുകാരണം കറവപ്പശുക്കള്‍ ഉള്‍പ്പെടെയുള്ള കന്നുകാലികളെ പുറത്തിറക്കാനും കഴിയാത്ത അവസ്ഥയിലാണ് കര്‍ഷകര്‍.