കാഞ്ഞങ്ങാട്: റെയില്‍വേ സ്റ്റേഷന്‍ കീഴടക്കി തെരുവ് നായകളുടെ വിളയാട്ടം. കാഞ്ഞങ്ങാട് റെയില്‍വേ സ്റ്റേഷനിലാണ് രാവെന്നും പകലെന്നുമില്ലാതെ തെരുവുനായ്ക്കള്‍ കൂട്ടമായി എത്തുന്നത്. ഇത്കാരണം യാത്രക്കാരാണ് ദുരിതത്തിലായിരിക്കുന്നത്. അതേസമയം സ്റ്റേഷനിലെ പ്ലാറ്റ്‌ഫോമിലും ടിക്കറ്റ് കൗണ്ടറിന് സമീപവും തെരുവുനായ ശല്യം രൂക്ഷമായിട്ടും നടപടിയെടുക്കാത്ത അധികൃതരുടെ അനാസ്ഥക്കെതിരേ പ്രതിഷേധം ശക്തമായിട്ടുണ്ട്.
യാത്രക്കാര്‍ ടിക്കറ്റെടുക്കാന്‍ ക്യൂ നില്‍ക്കുന്ന ഹാളില്‍പോലും പകല്‍ സമയങ്ങളില്‍ നായകള്‍ കിടന്നുറങ്ങുകയും ആളുകള്‍ക്ക് അസൗകര്യം സൃഷ്ടിക്കുന്ന സാഹചര്യവുമാണ് നിലവിലുള്ളത്. ജില്ലയിലെ എ ക്ലാസ് റെയില്‍വേ സ്റ്റേഷനായി ഉയര്‍ത്തിയ സ്റ്റേഷന്‍ പരിസരം കാടുമൂടി കിടക്കുന്നതിനാല്‍ നഗരത്തിലെ ഭൂരിഭാഗം തെരുവുനായകളും ഈഭാഗത്താണ് കേന്ദ്രീകരിക്കുന്നത്.
സമീപത്തായി കോട്ടച്ചേരി മത്സ്യ മാര്‍ക്കറ്റും സ്ഥിതി ചെയ്യുന്നതിനാല്‍ നായകളുടെ വിഹാര കേന്ദ്രമായി മാറിയിരിക്കുകയാണ് റെയില്‍വേ സ്റ്റേഷന്‍ പരിസരം.
അതേസമയം നിരവധി ആളുകള്‍ക്ക് നായകളുടെ അക്രമം നേരിടേണ്ടി വന്നെങ്കിലും നായകളില്‍നിന്ന് യാത്രക്കാരെ സംരക്ഷിക്കുന്നതിന് യാതൊരു നടപടിയും ഇതുവരെ കൈക്കൊണ്ടിട്ടില്ല.