കൊച്ചി: സൗത്ത് റെയില്‍വേ പ്രീപെയ്ഡ് സംവിധാനത്തില്‍ ഓടുന്നതിനു 3500 രൂപ ഒരു വര്‍ഷം അടക്കണമെന്ന റെയില്‍വേയുടെ നിര്‍ദേശത്തില്‍ പ്രതിഷേധിച്ച് ഓട്ടോറിക്ഷാ തൊഴിലാളി കോ ഓര്‍ഡിനേഷന്‍ കമ്മിറ്റിയുടെ നേതൃത്വത്തില്‍ നടത്തി വന്നിരുന്ന സമരം അവസാനിപ്പിച്ചു.
കോ ഓര്‍ഡിനേഷന്‍ കമ്മിറ്റിയും റെയില്‍വേ ഉദ്യോഗസ്ഥരുമായി എറണാകുളം സൗത്ത് അസിസ്റ്റന്റ് ട്രാഫിക് പൊലിസ് കമ്മിഷണര്‍ നിസാറിന്റെ നേതൃത്വത്തില്‍ നടത്തിയ ചര്‍ച്ചയില്‍ ഈ സംവിധാനം ഒരു മാസത്തേക്ക് നീട്ടി വെക്കുന്നതിനും പഴയ സംവിധാനം തുടരുവാനും തീരുമാനമായതിനെ തുടര്‍ന്നാണ് സമരം നിര്‍ത്തിവച്ചത്.
റയില്‍വേക്കു തൊഴിലാളി ഒരു വര്‍ഷം അടക്കേണ്ട തുകയായ 3500 രൂപയില്‍ ഇളവ് വാങ്ങാനും ഇതുമായി ബന്ധപ്പെട്ടവരെ കണ്ട് സംസാരിക്കുവാനും ധാരണയായി. ചര്‍ച്ചയില്‍ ഐ.എന്‍.ടി.യുസിയെ പ്രതിനിധീകരിച്ച് പി.ബി ലതീഷ്, ബി.ജെ ഫ്രാന്‍സിസ്, സി.ഐ.ടി.യുവിനെ പ്രതിനിധീകരിച്ച് കമലാസനന്‍, വിനയന്‍, എ.ഐ.ടി.യു.സിയിലെ സുനില്‍ കുമാര്‍, രാജേഷ്, ബി.എം.സിലെ അഭിലാഷ്, സതീശന്‍ എന്നിവര്‍ പങ്കെടുത്തു.