മക്ക: മക്കയില്‍ സഊദി സുരക്ഷാ സേനയുടെ ഭീകരവാദ വേട്ടയില്‍ നിരവധി പേരെ പിടികൂടി. വിശുദ്ധ നഗരിയായ മക്കയെ ലക്ഷ്യമാക്കി പ്രവര്‍ത്തിച്ചിരുന്ന സംഘത്തെയാണ് സുരക്ഷാ സേന പിടികൂടിയത്.
വിശുദ്ധ ഹറം പള്ളിയില്‍ നിന്ന് ഏതാനും കിലോമീറ്റര്‍ അകലെ മാത്രം സ്ഥിതിചെയ്യുന്ന കെട്ടിടത്തില്‍ നിന്നാണ് സുരക്ഷാ സേന സംഘത്തെ പിടികൂടിയതെന്ന് സഊദി സുരക്ഷാ വിഭാഗം അറിയിച്ചു.
വിവിധ രാജ്യക്കാരായ ആളുകള്‍ ഇവിടെ തമ്പടിച്ച് ഭീകരവാദ പ്രവര്‍ത്തനം ആസൂത്രണം ചെയ്തു വരികയായിരുന്നു. എന്നാല്‍ പിടികൂടിയവരില്‍ ഏതെല്ലാം രാജ്യക്കാരാണ് ഉള്‍പ്പെട്ടിരിക്കുന്നതെന്നോ എത്ര പേരാണ് പിടിയിലായതെന്നോ ആഭ്യന്തര മന്ത്രാലയം വെളിപ്പെടുത്തിയിട്ടില്ല.
ഭീകരവാദ സംഘം താവളമടിച്ചിട്ടുണ്ടെന്ന സൂചനയെത്തുടര്‍ന്ന് ചൊവ്വാഴ്ച രാവിലെയാണ് മക്ക അസീസിയയിലുള്ള കെട്ടിടം സുരക്ഷാ സേന വളഞ്ഞത്.