കൊല്ലം: ജില്ലാ എംപ്ലോയിമെന്റ് എക്‌സ്‌ചേഞ്ചിന്റെ ഭാഗമായ എംപ്ലോയബിലിറ്റി സെന്ററിന്റേയും യൂനുസ് കോളജ് ഓഫ് എന്‍ജിനീയറിങിന്റേയും നേതൃത്വത്തില്‍ മെഗാ തൊഴില്‍മേള 'ദിശ 2018' ജൂണ്‍ രണ്ടിന് നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.
പള്ളിമുക്ക് യൂനുസ് കോളജ് ഓഫ് എന്‍ജിനീയറിങില്‍ മന്ത്രി കെ. രാജു ഉദ്ഘാടനം ചെയ്യും. 3000ത്തില്‍ പരം ഒഴിവുകളിലേക്കായി 50 ഓളം സ്വകാര്യ സ്ഥാപനങ്ങള്‍ മേളയില്‍ പങ്കെടുക്കും. എസ്.എസ്.എല്‍സി, പ്ലസ് ടു യോഗ്യതയുള്ള 18നും 35നും ഇടയില്‍ പ്രായമുള്ള ഉദ്യോഗാര്‍ഥികള്‍ക്കും അവസാന വര്‍ഷ വിദ്യാര്‍ഥികള്‍ക്കും പരീക്ഷ ഫലം കാത്തിരിക്കുന്നവര്‍ക്കും മേളയില്‍ പങ്കെടുക്കാം.ബാങ്കിങ് ആന്‍ഡ് ഫിനാന്‍സ്, അക്കൗണ്ട്‌സ്, മാര്‍ക്കറ്റിങ്, എന്‍ജിനീയറിങ്, എച്ച്.ആര്‍, ഐ.ടി, എജ്യൂക്കേഷന്‍, ഹോസ്പിറ്റാലിറ്റി, ടെലികമ്മ്യൂണിക്കേഷന്‍, ഫാര്‍മസ്യൂട്ടിക്കല്‍ തുടങ്ങിയ വിവിധ മേഖലകളിലേക്കുള്ള ഒഴിവുകളിലേക്ക് മേളയില്‍ അവസരം ലഭിക്കും.
31നു മുന്‍പായി എംപ്ലോയബിലിറ്റി സെന്ററില്‍ പേരു രജിസ്റ്റര്‍ ചെയ്യുന്ന ഉദ്യോഗാര്‍ഥികള്‍ക്ക് തൊഴില്‍ മേളയില്‍ മുന്‍ഗണന ലഭിക്കുമെന്ന് സംഘാടകര്‍ അറിയിച്ചു. വാര്‍ത്താ സമ്മേളനത്തില്‍ എ. യൂനുസ് കുഞ്ഞ്, സി.വി സുധീര, നസീറ നിസാര്‍, അനീഷ് പി. തങ്കച്ചന്‍, മുഹമ്മദ് റിയാസ് പങ്കെടുത്തു.