തിരുവനന്തപുരം: കെ.എം മാണിക്കു പിറകെ പോകേണ്ട സാഹചര്യം ഇപ്പോള്‍ ഇല്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. പാര്‍ട്ടിക്ക് എസ്.എന്‍.ഡി.പിയുമായി അടുത്ത ബന്ധമാണുള്ളതെന്നും അദ്ദേഹം മാധ്യമങ്ങളോടു പറഞ്ഞു.
മാണിയുടെ പാര്‍ട്ടി ഇപ്പോള്‍ യു.ഡി.എഫിനൊപ്പമാണ്. ഉപതെരഞ്ഞെടുപ്പുകള്‍ വരുമ്പോള്‍ യു.ഡി.എഫുമായി അടുക്കുകയും അല്ലാത്ത സമയത്തു വിട്ടുനില്‍ക്കുകയുമാണ് അവര്‍ ചെയ്യുന്നത്. അവരുമായി ചര്‍ച്ചയ്ക്ക് ഇപ്പോള്‍ പ്രസക്തിയില്ല. ചെങ്ങന്നൂരില്‍ എസ്.എന്‍.ഡി.പി നല്ലൊരു മാതൃകയാണ് സ്വീകരിച്ചത്. എസ്.എന്‍.ഡി.പിയുമായി പാര്‍ട്ടിക്ക് അടുത്ത ബന്ധമുണ്ടെങ്കിലും ബി.ഡി.ജെ.എസുമായി അങ്ങനെയല്ല. ജാതിയുടെ പേരില്‍ ബി.ജെ.പി ഉണ്ടാക്കിയ പാര്‍ട്ടിയാണത്. സാമുദായികാടിസ്ഥാനത്തിലുള്ള പാര്‍ട്ടികളുമായി സി.പി.എം ബന്ധമുണ്ടാക്കില്ല. മുന്‍പ് എസ്.എന്‍.ഡി.പി രൂപീകരിച്ച എസ്.ആര്‍.പി, എന്‍.എസ്.എസ് രൂപീകരിച്ച എന്‍.ഡി.പി, ധീവര സഭ രൂപീകരിച്ച ഡി.എല്‍.പി എന്നീ പാര്‍ട്ടികളുമായി സി.പി.എം ബന്ധമുണ്ടാക്കിയിട്ടില്ല.
ആര്‍.എസ്.പി ഇപ്പോള്‍ കേരളത്തില്‍ കൂടുതല്‍ കോണ്‍ഗ്രസ് അനുകൂല നിലപാടാണ് സ്വീകരിക്കുന്നതെന്ന് ചോദ്യത്തിനു മറുപടിയായി കോടിയേരി പറഞ്ഞു. ദേശീയ തലത്തില്‍ അവര്‍ ഇടതുപക്ഷത്തിനൊപ്പമാണ്.
ഒരു ലോക്‌സഭാ സീറ്റിന്റെ പേരിലാണ് അവര്‍ എല്‍.ഡി.എഫ് വിട്ട് യു.ഡി.എഫിലേക്കു പോയത്. അതുവഴി നിയമസഭയില്‍ സീറ്റില്ലാതായിട്ടും അവര്‍ പാഠം പഠിച്ചില്ല. ഇനി ലോക്‌സഭാ സീറ്റില്‍ കൂടി തോറ്റാല്‍ പഠിച്ചുകൊള്ളുമെന്നും കോടിയേരി പറഞ്ഞു.