പൊന്നാനി: തിയറ്റര്‍ പീഡനത്തില്‍ പൊലിസില്‍ പരാതി നല്‍കിയ ചൈല്‍ഡ് ലൈന്‍ പ്രവര്‍ത്തകനെ അറസ്റ്റ് ചെയ്യാന്‍ അന്വേഷണ സംഘത്തിന്റെ നീക്കം. തിയറ്റര്‍ ഉടമയുടെ അറസ്റ്റിനുപിന്നാലെയാണ് വിഷയത്തില്‍ പരാതി നല്‍കിയ ചൈല്‍ഡ് ലൈന്‍ പ്രവര്‍ത്തകനെയും അറസ്റ്റ് ചെയ്യാനുള്ള നീക്കം നടക്കുന്നത്. സംഭവത്തില്‍ തിയറ്റര്‍ ഉടമയെയും ചൈല്‍ഡ് ലൈന്‍ പ്രവര്‍ത്തകനെയും പൊലിസ് ചോദ്യം ചെയ്തത് പത്തിലേറെ തവണയാണ്.
കേസിലെ പ്രതികളായ മൊയ്തീന്‍കുട്ടിയേയും പെണ്‍കുട്ടിയുടെ അമ്മയേയും ഒരു തവണ മാത്രം ചോദ്യം ചെയ്ത് കുറ്റപത്രം തയാറാക്കിയ പൊലിസ് കേസ് പുറത്തെത്തിച്ചവരെ മാനസികമായി തളര്‍ത്താനുള്ള നീക്കമാണ് നടത്തുന്നതെന്നാണ് ആരോപണം. ചൈല്‍ഡ്‌ലൈന്‍ പ്രവര്‍ത്തകനേയും തിയറ്റര്‍ ഉടമയേയും നിരന്തരം ചോദ്യം ചെയ്യുകയും മൊഴിയെടുക്കുകയും ചെയ്ത പൊലിസ് ഒടുവില്‍ ശാരദാ തിയറ്റര്‍ ഉടമ സതീശിനെതിരേ കേസെടുക്കുകയും ചോദ്യം ചെയ്യാന്‍ വിളിപ്പിച്ച ശേഷം നിയമവിരുദ്ധമായി അറസ്റ്റ് ചെയ്യുകയുമാണ് ഉണ്ടായത്. സമാനമായ നീക്കം തന്നെയാണ് ചൈല്‍ഡ്‌ലൈന്‍ പ്രവര്‍ത്തകന്റെ കാര്യത്തിലും പൊലിസ് നടത്തിയത്.