കോഴിക്കോട്: സമൂഹ മാധ്യമങ്ങള്‍ വഴി നിപാ വൈറസ് ബാധയുടെ പേരില്‍ വ്യാജ സന്ദേശം അയച്ച ഒന്‍പതു പേര്‍ അറസ്റ്റില്‍. തിരൂര്‍ സ്വദേശികളായ നിയാസ്, സുനില്‍, നിമിഷ, ഷിയാസ്, അനില്‍കുമാര്‍, നിയാസ്, കുന്നമംഗലം സ്വദേശി രാജേഷ്, കാരന്തൂര്‍ സ്വദേശികളായ ശശികുമാര്‍, അബ്ദുല്‍സലാം എന്നിവരെയാണ് നടക്കാവ് പൊലിസ് രജിസ്റ്റര്‍ ചെയ്ത കേസില്‍ ഇന്നലെ അറസ്റ്റ് ചെയ്തത്. ഇതോടെ നിപാ ബാധയുടെ പേരില്‍ വ്യാജ സന്ദേശം അയച്ച 22 പേര്‍ അറസ്റ്റിലായി. ജില്ലാ മെഡിക്കല്‍ ഓഫിസറുടെ വ്യാജ ലെറ്റര്‍പാഡിലുള്ള തെറ്റായ അറിയിപ്പ് ഫോര്‍വേഡ് ചെയ്തതിനാണ് ഇവര്‍ അറസ്റ്റിലായത്. കോഴിയിലൂടെ നിപാ വൈറസ് ബാധിക്കുമെന്നാണ് ലെറ്റര്‍ പാഡിലൂടെ ഇവര്‍ പ്രചരിപ്പിച്ചത്. തെറ്റായ സന്ദേശങ്ങള്‍ പ്രചരിപ്പിച്ചാല്‍ പൊതുജനങ്ങള്‍ക്കെതിരേ നടപടിയെടുക്കുകയും അത്തരം സന്ദേശങ്ങള്‍ കിട്ടിയാല്‍ ബന്ധപ്പെട്ട അധികാരികളെ അറിയിക്കണമെന്നും ജില്ലാ പൊലിസ് മേധാവി നേരത്തെ അറിയിച്ചിരുന്നു. ഫറോക്ക്, നല്ലളം പൊലിസ് സ്റ്റേഷനുകളിലും നിപാ വ്യാജ സന്ദേശത്തിന് കേസെടുത്തിട്ടുണ്ട്.