കൊല്ലം: കരിമ്പനി റിപോര്‍ട്ട് ചെയ്യപ്പെട്ട കുളത്തൂപ്പുഴ വില്ലുമല കോളനിയില്‍ ആരോഗ്യവകുപ്പ് ഇന്നലെ മെഡിക്കല്‍ ക്യാംപ് നടത്തി.
ജില്ലാ മെഡിക്കല്‍ ഓഫിസിന്റെയും കൂളത്തൂപ്പുഴ സാമൂഹികാരോഗ്യ കേന്ദ്രത്തിന്റെയും സംയുക്താഭിമുഖ്യത്തില്‍ നടത്തിയ ക്യാംപില്‍ 179 പേര്‍ പങ്കെടുത്തു.
57 പേരുടെ രക്ത സാംപിളുകള്‍ പരിശോധിച്ചു. വിളര്‍ച്ച കണ്ടെത്തിയിനെത്തുടര്‍ന്ന് 34 പേരെ വിദഗ്ധ പരിശോധനയ്ക്ക് വിധേയരാക്കുകയും ചെയ്തു. ആരിലും കരിമ്പനിയുടെ ലക്ഷണം കണ്ടെത്തിയിട്ടില്ലെന്ന് ജില്ലാ മെഡിക്കല്‍ ഓഫിസര്‍ ഡോ. വി.വി. ഷേര്‍ളി അറിയിച്ചു.
കുളത്തൂപ്പുഴ ഗ്രാമപഞ്ചായത്ത് പ്രസിഡന്റ് സാബു ഏബ്രഹാം ക്യാംപ് ഉദ്ഘാടനം ചെയ്തു. ജില്ലാ മാസ് മീഡിയ ഓഫിസര്‍ ഗീതാമണി അന്തര്‍ജ്ജനം, ജില്ലാ മലേറിയ ഓഫിസര്‍ ടി. സുരേഷ് എന്നിവര്‍ കരിമ്പനിയെക്കുറിച്ചും പ്രതിരോധ മാര്‍ഗങ്ങളെക്കുറിച്ചും വിശദമാക്കി. ജില്ലാ വെക്ടര്‍ കണ്‍ട്രോള്‍ യൂനിറ്റിന്റെ നേതൃത്വത്തില്‍ ഭവനസന്ദര്‍ശനവും സ്‌പ്രേയിങും നടത്തി.
കരിമ്പനി പരിശോധനയ്ക്കുള്ള ആര്‍.കെ 39 കിറ്റ് ഇന്ന് ന്യൂഡല്‍ഹിയില്‍നിന്ന് എത്തിക്കും. രോഗം ബാധിച്ച സുഭാഷിന്റെ വീട്ടിലും സമീപ വീടുകളിലുമുള്ളവരെ കിറ്റ് ഉപയോഗിച്ചുള്ള വിശദ പരിശോധനയ്ക്ക് വിധേയരാക്കും.