തിരുവനന്തപുരം: മത്സ്യ മേഖലയ്ക്ക് സമഗ്രമായ സാമ്പത്തിക പാക്കേജ് പരിഗണിക്കണമെന്ന ആവശ്യം വിശദമായി കേന്ദ്രസര്‍ക്കാരിനു മുന്നില്‍ അവതരിപ്പിക്കുമെന്ന് മുഖ്യമന്ത്രി പറഞ്ഞു. കൊവിഡിന് ശേഷമുള്ള ഘട്ടത്തില്‍ അതിജീവനത്തിനായി മേഖലയില്‍ അടിയന്ത്ര പുനരുജ്ജീവന നടപടികളില്‍ ശ്രദ്ധ കേന്ദ്രീകരിക്കും. ബദല്‍ ഉപജീവന മാര്‍ഗം നല്‍കുന്നതിന് പ്രാമുഖ്യം നല്‍കും. മത്സ്യ വിതരണ ശൃംഖല നവീകരിക്കുന്നതിന് പുതിയ മൊബൈല്‍ ആപ്ലിക്കേഷന്‍ സാധ്യതകള്‍ പ്രയോജനപ്പെടുത്തും. സംസ്ഥാനത്തെ വലിയ ജലാശയങ്ങള്‍ ഉള്‍നാടന്‍ മത്സ്യ കൃഷിക്ക് കീഴില്‍ കൊണ്ടുവരും അവയില്‍ തദ്ദേശ സ്ഥാപനങ്ങളുടെയും കുടുംബശ്രീയുടെയും സഹായത്തോടെ മത്സ്യകൃഷി വ്യാപിപ്പിക്കും. ഉപയോഗ ശൂന്യമായ കുളങ്ങളെയും മത്സ്യ കൃഷിക്കായി ഏറ്റെടുക്കും. മത്സ്യ മേഖലയിലെ സ്ഥാപന വായ്പ വര്‍ധിപ്പിക്കുന്നതിന് പുതിയ വായ്പാ നയം രൂപീകരിക്കും.

ആഴക്കടല്‍ മത്സ്യ ബന്ധനത്തിന് സാങ്കേതിക സംവിധാനം ഉണ്ടാക്കും. ഗുണ നിലവാരമുള്ള മത്സ്യവിത്തുകളുടെ ഉല്പാദനം ശക്തിപ്പെടുത്തും. കടലിലെ മത്സ്യക്കൃഷിക്ക് സാധ്യതകള്‍ പരിശോധിക്കും. അലങ്കാര മത്സ്യ മേഖലയിലെ സാധ്യത കൂൂടുതല്‍ പ്രയോജനപ്പെടുത്തും. തദ്ദേശീയ അലങ്കാരമത്സ്യങ്ങളുടെ കൃഷി പ്രോത്സാഹിപ്പിക്കും. ഫിന്‍ ഫിഷ് കൃഷി വാണിജ്യാടിസ്ഥാനത്തില്‍ വര്‍ധിപ്പിക്കും. വനിതാ സ്വാശ്രയ സംഘങ്ങള്‍ക്കുള്ള ഉപജീവന സഹായ പദ്ധതിയായി മത്സ്യ കൃഷിയും ചിപ്പി കൃഷിയും വ്യാപകമാക്കും. വനാമി ചെമ്മീന്‍ കൃഷി വ്യാപകമാക്കാനുള്ള മുന്‍ തീരുമാനം നടപ്പാക്കും. ഇതിലൂടെ ചെമ്മീന്‍ കൃഷിയില്‍ സമീപകാലത്തുണ്ടായ തിരിച്ചടി അതിജീവിക്കാനാകുമെന്നാണ് കരുതുന്നതെന്നും മുഖ്യമന്ത്രി പറഞ്ഞു.