ന്യൂഡല്‍ഹി: ജെ.എന്‍.യുവില്‍ ജനുവരി അഞ്ചിനുണ്ടായ എ.ബി.വി.പി അതിക്രമം സംബന്ധിച്ച കേസിലെ അന്വേഷണ പുരോഗതി സംബന്ധിച്ച് ഡല്‍ഹി കോടതി ഡല്‍ഹി പൊലിസ് ക്രൈംബ്രാഞ്ചിനോട് റിപ്പോര്‍ട്ട് തേടി.
അതിക്രമത്തില്‍ പരുക്കേറ്റ അധ്യാപിക സുചിത്ര സെന്നിന്റെ ഹരജിയില്‍ മെട്രോ പൊളിറ്റന്‍ മജിസ്‌ട്രേറ്റ് വിപുല്‍ സാന്ത്‌വാറാണ് റിപ്പോര്‍ട്ട് തേടിയത്. അക്രമത്തില്‍ വിദ്യാര്‍ഥി യൂനിയന്‍ നേതാവ് ഐഷെ ഘോഷ് ഉള്‍െപ്പടെ നിരവധി പേര്‍ക്ക് പരുക്കേറ്റിരുന്നു. വസന്ത് കുഞ്ച് സ്‌റ്റേഷനില്‍ രജിസ്റ്റര്‍ ചെയ്ത കേസ് ക്രൈംബ്രാഞ്ചിന് കൈമാറിയ ശേഷം ഒരു നടപടിയും ഉണ്ടായിട്ടില്ലെന്ന് ചൂണ്ടിക്കാട്ടിയാണ് സുചിത്ര സെന്‍ ഹരജി സമര്‍പ്പിച്ചത്.
കേസ് മനഃപൂര്‍വം തേച്ചുമായ്ച്ചുകളയാന്‍ പൊലിസ് ശ്രമിക്കുന്നുണ്ടെന്നും ഹരജിയില്‍ ആരോപിച്ചിരുന്നു. കേസുമായി ബന്ധപ്പെട്ടതെല്ലാം ക്രൈംബ്രാഞ്ചിന് കൈമാറിയതായി ഡല്‍ഹി പൊലിസ് കോടതിയെ അറിയിച്ചിരുന്നു. തുടര്‍ന്നാണ് ക്രൈംബ്രാഞ്ചിനോട് റിപ്പോര്‍ട്ട് സമര്‍പ്പിക്കാന്‍ ആവശ്യപ്പെട്ടത്.