ദമാം: സഊദിയില്‍ ഉള്‍ക്കടലില്‍ മീന്‍ പിടുത്തതിന് പോയ ബോട്ട് അപകടത്തില്‍ പെട്ട് രണ്ടു ഇന്ത്യക്കാര്‍ മരിച്ചു. ഒരാള്‍ രക്ഷപ്പെട്ടു. കാണാതായ മറ്റൊരാള്‍ക്ക് വേണ്ടി തിരച്ചില്‍ തുടരുകയാണ്.

കിഴക്കന്‍ പ്രവിശ്യയിലെ ജുബൈലില്‍ നിന്നും ഉള്‍ക്കടലില്‍ മീന്‍ പിടുത്തതിനായി പോയ നാലംഗ സംഘത്തിന്റെ ബോട്ടാണ് ശക്തമായ കടല്‍ ക്ഷോഭത്തില്‍ പെട്ട് തകര്‍ന്നത്. കാണാതായവര്‍ക്ക് വേണ്ടി തീരസംരക്ഷണ സേനയുടെ നേതൃത്വത്തിലാണ് തിരച്ചില്‍ തുടരുന്നത്. രണ്ടു ദിവസം മുന്‍പ് അപകടത്തില്‍ പെട്ടെങ്കിലും സംഭവം ആരും അറിഞ്ഞിരുന്നില്ല. പതിവ് പട്രോളിംഗിനിടെ, തീര സംരക്ഷണ സേനയാണ് ബോട്ട് മറിഞ്ഞ നിലയില്‍ കണ്ടെത്തിതിനെ തുടര്‍ന്നാണ് തിരച്ചില്‍ ആരംഭിച്ചത്.

പകല്‍ ശാന്തമായിരുന്ന കടല്‍ രാത്രിയോടെ പ്രക്ഷുബ്ധമാവുകയും കാറ്റ് ശക്തി പ്രാപിക്കുകയുമായിരുന്നു. നിയന്ത്രണം നഷ്ടപ്പെട്ട് കടലില്‍ മുങ്ങിയ ബോട്ടിലെ മരത്തടിയില്‍ അതിസാഹസികമായി പിടിച്ചു നിന്നാണ് ഈജിപ്ഷ്യന്‍ സ്വദേശി രക്ഷപ്പെട്ടത്. കാണാതായ നാലാമത്തെ ഇന്ത്യക്കാരനായ മത്സ്യത്തൊഴിലാളിക്കു വേണ്ടിയുള്ള തെരച്ചില്‍ ശക്തമാക്കിയിതായി അധികൃതര്‍ അറിയിച്ചു.

വിശ്രമത്തിനിടെ പൊടുന്നനെയാണ് കാറ്റടിച്ചതിനാല്‍ ആരും ലൈഫ് ജാക്കറ്റ് ധരിച്ചില്ലായിരുന്നു.

അഞ്ച് ദിവസത്തെ മത്സ്യ ബന്ധനത്തിനാണ് മൂന്ന് ഇന്ത്യക്കാരും ഒരു ഈജിപ്ഷ്യന്‍ സ്വദേശിയും ഉള്‍പ്പെട്ട സംഘം പുറപ്പെട്ടത്. ഖലീഫ അബ്ദുലത്തീഫ് അല്‍ദുഹൈമിന്റെ ഉടമസ്ഥതിയിലുള്ളതാണ് അപകടത്തില്‍ പെട്ട ബോട്ട്.

തിരിച്ചറിഞ്ഞിട്ടില്ലെങ്കിലും കണ്ടെടുത്ത മൃതദേഹങ്ങള്‍ ജുബൈല്‍ ജനറല്‍ ആശുപത്രിയിലേക്ക് മാറ്റിയിട്ടുണ്ട്.