കൊച്ചി: എറണാകുളം മലയിടംതുരുത്തിലെ കുടിയൊഴിപ്പിക്കലുമായി ബന്ധപ്പെട്ട് പെരുമ്പാവൂര്‍ മുന്‍സിഫ് കോടതിയിലെ തുടര്‍നടപടികള്‍ക്ക് ഹൈക്കോടതി ഒരു വര്‍ഷത്തേക്ക് സ്റ്റേ അനുവദിച്ചു. ഒരു വര്‍ഷത്തിനുള്ളില്‍ കുടിയൊഴിപ്പിക്കപ്പെടുന്ന കുടുംബങ്ങളുടെ പുനരധിവാസം പൂര്‍ത്തിയാക്കുമെന്ന സര്‍ക്കാരിന്റെ ഉറപ്പിന്റെ അടിസ്ഥാനത്തിലാണ് കോടതി നടപടി.

മലയിടംതുരുത്തിലെ കുടുംബങ്ങള്‍ക്ക് തര്‍ക്കഭൂമിക്ക് സമീപം തന്നെ വീട് നിര്‍മിച്ച് നല്‍കുമെന്ന് സര്‍ക്കാര്‍ നേരത്തെ അറിയിച്ചിരുന്നു. പുതിയ വീടുകളുടെ നിര്‍മാണം പൂര്‍ത്തിയാകുന്നതുവരെ നിലവില്‍ താമസിക്കുന്ന സ്ഥലത്ത് തുടരാമെന്നും സമരവുമായി ബന്ധപ്പെട്ട് രജിസ്റ്റര്‍ ചെയ്ത എല്ലാ കേസുകളും പിന്‍വലിക്കുമെന്നും ധാരണയായിരുന്നു. ശങ്കരന്‍നായരുടെ സ്ഥലത്ത് അഞ്ച് സെന്റ് വീതം ഭൂമി അനുവദിച്ചാണ് വീടുകള്‍ നിര്‍മിച്ചു നല്‍കുക.

ALSO READ: ഓപ്പറേഷന്‍ തൂഫാന്‍ മെഡിക്കല്‍ ഷോപ്പുകളിലേക്കും; കുറിപ്പടിയില്ലാതെ മരുന്ന് നല്‍കിയാല്‍ കര്‍ശന നടപടി: ആഭ്യന്തരമന്ത്രി 

മെയ് 20നാണ് മലയിടംതുരുത്ത് പാരിയത്തുകാവ് പട്ടികജാതി കോളനിയിലെ കുടിയൊഴിപ്പിക്കല്‍ നടപടിക്കായി പൊലിസ് ഉള്‍പ്പെടെയുള്ള അധികൃതര്‍ സ്ഥലത്തെത്തിയത്. സുപ്രിംകോടതി നിര്‍ദേശത്തിന്റെ അടിസ്ഥാനത്തിലായിരുന്നു നടപടി. അഭിഭാഷക കമ്മിഷണര്‍ അഡ്വ. ജയപാലിന്റെ നേതൃത്വത്തില്‍ ഒഴിപ്പിക്കല്‍ ആരംഭിച്ചതോടെ നാട്ടുകാര്‍ ശക്തമായ പ്രതിഷേധവുമായി രംഗത്തെത്തി.

പ്രതിഷേധം രൂക്ഷമായതോടെ പൊലിസ് ഇടപെട്ടിരുന്നു. ലാത്തിച്ചാര്‍ജ് നടത്തിയതായി പ്രതിഷേധക്കാര്‍ ആരോപിക്കുകയും പൊലിസ് നടപടിയില്‍ നിരവധി പേര്‍ക്ക് പരുക്കേല്‍ക്കുകയും ചെയ്തു. ഇതിന് മുമ്പും പലതവണ കുടിയൊഴിപ്പിക്കാന്‍ ശ്രമിച്ചിരുന്നെങ്കിലും ജനകീയ പ്രതിഷേധത്തെ തുടര്‍ന്ന് നടപടികള്‍ മാറ്റിവെച്ചിരുന്നു.

പിന്നീട് പ്രതിഷേധം ശക്തമായ സാഹചര്യത്തില്‍ മന്ത്രി റോജി എം. ജോണിന്റെ നേതൃത്വത്തില്‍ നടന്ന ചര്‍ച്ചയിലാണ് പുനരധിവാസം ഉറപ്പാക്കുന്നതടക്കമുള്ള കാര്യങ്ങളില്‍ ധാരണയായത്. ഇതിന്റെ തുടര്‍ച്ചയായാണ് ഇപ്പോള്‍ ഹൈക്കോടതി ഒരു വര്‍ഷത്തേക്ക് കോടതി നടപടികള്‍ സ്റ്റേ ചെയ്തിരിക്കുന്നത്.

The High Court has granted a one-year stay on further proceedings in the Perumbavoor Munsif Court related to the eviction in Malayidathuruthu, Ernakulam.The court’s decision was based on the government’s assurance that the rehabilitation of the families who will be evicted will be completed within one year.