ഗൂഡല്ലൂര്‍: ഗൂഡല്ലൂര്‍ താലൂക്ക് മുസ്‌ലിം യതീംഖാനയില്‍ വര്‍ഷം തോറും നടത്തി വരാറുള്ള വനിതാ സന്ദര്‍ശനം ഈമാസം 16ന് നടക്കും. ഇതോടനുബന്ധിച്ചുള്ള പ്രാര്‍ഥനാദിനവും ഞായറാഴ്ച യതീംഖാനയില്‍ നടക്കും.
പാണക്കാട് സയ്യിദ് ശഹീറലി ശിഹാബ് തങ്ങള്‍ പ്രാര്‍ഥനക്ക് നേതൃത്വം നല്‍കും. പരിപാടിക്കുള്ള ഒരുക്കങ്ങള്‍ പൂര്‍ത്തിയായതായി സംഘാടകര്‍ അറിയിച്ചു. കഴിഞ്ഞ വര്‍ഷം വനിതാ സന്ദര്‍ശനത്തിന് നീലഗിരി ജില്ലയില്‍ നിന്നും കേരള, കര്‍ണാടക, തമിഴ്‌നാട് സംസ്ഥാന ത്തിന്റെ വിവിധ പ്രദേശങ്ങളില്‍ നിന്നും അന്‍പതിനായിരത്തോളം സ്ത്രീകളാണ് യതീംഖാനയിലെത്തിയിരുന്നത്. ഇത്തവണവും വിപുലമായ ഒരുക്കങ്ങളാണ് യതീംഖാന ഒരുക്കിയിരിക്കുന്നത്.
 സന്ദര്‍ശനത്തിനായി എത്തുന്നവര്‍ക്ക് ഭക്ഷണ പാനിയങ്ങള്‍ നല്‍കാനും സംവിധാനങ്ങളൊരുക്കിയിട്ടുണ്ട്. സന്ദര്‍ശനത്തിന്റെ ഭാഗമായി കഴിഞ്ഞ വര്‍ഷം തമിഴ്‌നാട് ട്രാന്‍സ്‌പോര്‍ട്ട് ബസുകള്‍ യതീംഖാനയിലേക്ക് പ്രത്യേക സര്‍വിസ് നടത്തിയിരുന്നു. ഇക്കുറിയും ബസ് സര്‍വിസ് ഉണ്ടാകുമെന്ന പ്രതീക്ഷയിലാണ് അധികൃതര്‍.