ഷാർജ: പൊതുജനങ്ങളുടെയും സന്ദർശകരുടെയും ഏറെക്കാലത്തെ ആവശ്യങ്ങൾ പരിഗണിച്ചുകൊണ്ട് ഷാർജ മുനിസിപ്പാലിറ്റി നടപ്പിലാക്കിയ പുതിയ അർദ്ധരാത്രി പാർക്കിംഗ് നിയമത്തിന്റെ ആദ്യ രാത്രിയിൽ താമസക്കാർക്കിടയിൽ സമ്മിശ്ര പ്രതികരണം. ജൂലൈ 1 മുതൽ പണമടച്ചുള്ള പൊതു പാർക്കിംഗ് സമയം രാത്രി 10 മണി വരെ നീട്ടിയ നീക്കം ചില വാഹനമോടിക്കുന്നവർക്ക് ആശ്വാസം നൽകിയപ്പോൾ, തിരക്കേറിയ മറ്റ് ചില പ്രദേശങ്ങളിൽ ഇപ്പോഴും പാർക്കിംഗ് കണ്ടെത്തുക പ്രതിസന്ധിയായി തുടരുകയാണ്.

അധികമായി ലഭിച്ച രണ്ട് മണിക്കൂറുകൾ പാർക്കിംഗ് സൗകര്യത്തിൽ കാര്യമായ വ്യത്യാസം വരുത്തിയിട്ടുണ്ടോ എന്ന് കണ്ടെത്താൻ വിവിധ റെസിഡൻഷ്യൽ മേഖലകളിലെ താമസക്കാരുമായി നടത്തിയ ചർച്ചയിൽ നിന്നാണ് സമ്മിശ്ര അനുഭവങ്ങൾ പുറത്തുവന്നത്.

അൽ നഹ്ദ യിലെ താമസക്കാരനായ ഗോവിന്ദിന് പുതിയ നിയമം താല്ക്കാലിക ആശ്വാസം നൽകി. രാത്രി 10 മണിയോടെ കെട്ടിടത്തിന് സമീപം പാർക്കിംഗ് സ്ഥലങ്ങൾ ലഭ്യമായിരുന്നുവെന്നും, സാധാരണ പോലെ 20-30 മിനിറ്റ് ചുറ്റിത്തിരിയേണ്ടി വന്നില്ലെന്നും അദ്ദേഹം വ്യക്തമാക്കി. എന്നാൽ രാത്രി 11 മണിയോടെ ഈ സ്ഥലങ്ങളെല്ലാം വീണ്ടും നിറഞ്ഞതായും അദ്ദേഹം കൂട്ടിച്ചേർത്തു. മറ്റൊരു നിവാസിയായ ഷമീം ഹുസൈന്റെ അഭിപ്രായത്തിൽ പലർക്കും പുതിയ സമയക്രമത്തെക്കുറിച്ച് ആദ്യ രാത്രിയിൽ കൃത്യമായ ധാരണയുണ്ടായിരുന്നില്ല.

അൽ മജാസ് പരിസരത്ത് പുതിയ നിയമം ആദ്യ രാത്രിയിൽ കാര്യമായ മാറ്റമുണ്ടാക്കിയില്ലെന്ന് സിറ്റി സെന്റർ ബിൽഡിംഗിലെ താമസക്കാരനായ മാലിക് ഖാൻ പറയുന്നു. അൽ ഖാൻ, അൽ താവൂൺ മേഖലകളിൽ നടക്കുന്ന റോഡ് പണികൾ കാരണം മറ്റ് പ്രദേശങ്ങളിൽ നിന്നുള്ളവരും ഇവിടേക്ക് പാർക്കിംഗിനായി എത്തുന്നതാണ് ഇതിന് കാരണം. റെസ്റ്റോറന്റുകളും കോർണിഷും ഉള്ളതിനാൽ വാരാന്ത്യങ്ങൾക്ക് ശേഷമേ ഇതിന്റെ യഥാർത്ഥ ആഘാതം വിലയിരുത്താനാകൂ എന്ന് അദ്ദേഹം അഭിപ്രായപ്പെട്ടു.

അൽ മജാസിൽ റോഡ് പണികളും കനത്ത ഗതാഗതക്കുരുക്കും കാരണം ആളുകൾ വൈകി വീട്ടിലെത്തുന്നതിനാലാണ് ചില പാർക്കിംഗ് ഇടങ്ങൾ ഒഴിഞ്ഞുകിടക്കുന്നതെന്നും, പുതിയ നിയമത്തിന്റെ ആഘാതം അറിയാൻ കുറച്ചുദിവസം കൂടി വേണമെന്നും അബ്ദുൽ റഹ്മാൻ വ്യക്തമാക്കി.

അൽ മഹത്ത മ്യൂസിയത്തിന് സമീപം താമസിക്കുന്ന സാഖിബ് അർമറിന്റെ അഭിപ്രായത്തിൽ, ഇതൊരു തിരക്കേറിയ ഷോപ്പിംഗ് ഏരിയ ആയതിനാൽ സാധാരണയായി രാത്രി 11:30 ന് ശേഷമാണ് (ഷോപ്പുകൾ അടയ്ക്കുമ്പോൾ) പാർക്കിംഗ് ലഭ്യമാകുന്നത്. ആദ്യ രാത്രിയിൽ ഇവിടെ വലിയ മാറ്റങ്ങളൊന്നും ദൃശ്യമായില്ല.

എന്തുകൊണ്ട് ഈ സമയമാറ്റം?

റെസിഡൻഷ്യൽ, വാണിജ്യ മേഖലകളിൽ പൊതു പാർക്കിംഗ് സ്ഥലങ്ങൾ ദുരുപയോഗം ചെയ്യുന്നത് തടയുന്നതിനും, പാർക്കിംഗ് ലഭ്യത മെച്ചപ്പെടുത്തുന്നതിനുമാണ് സമയം നീട്ടിയതെന്ന് ഷാർജ മുനിസിപ്പാലിറ്റി അറിയിച്ചു. പ്രത്യേകിച്ചും സീസണൽ പാർക്കിംഗ് സബ്‌സ്‌ക്രിപ്‌ഷൻ ഉള്ളവർക്കും, രാത്രി സമയങ്ങളിൽ റെസ്റ്റോറന്റുകളും കഫറ്റീരിയകളും സന്ദർശിക്കുന്നവർക്കും രാത്രി 10 മണിക്ക് ശേഷം പാർക്കിംഗ് ലഭിക്കാൻ ബുദ്ധിമുട്ടുന്നു എന്ന ഫീഡ്‌ബാക്കിന്റെ അടിസ്ഥാനത്തിലാണ് ഈ നടപടി.

പുതിയ അർദ്ധരാത്രി പാർക്കിംഗ് നിയമം നഗരത്തിലെ പാർക്കിംഗ് പ്രശ്നങ്ങൾക്ക് ശാശ്വത പരിഹാരമാകുമോ എന്ന് കൃത്യമായി വിലയിരുത്താൻ വരും ദിവസങ്ങളിലെയും വരാനിരിക്കുന്ന വാരാന്ത്യത്തിലെയും പാർക്കിംഗ് രീതികൾ കൂടി നിരീക്ഷിക്കേണ്ടതുണ്ടെന്നാണ് ഭൂരിഭാഗം താമസക്കാരുടെയും പൊതുവിലയിരുത്തൽ.

ALSO READ: ഇത്തിഹാദ് റെയിൽ സ്റ്റേഷനിലേക്ക് ഇനി വെറും 10 ദിർഹം കൊണ്ട് എത്താം; അബുദബിയിൽ ഷട്ടിൽ ബസ് സർവീസുകൾ ആരംഭിച്ചു

Sharjah's new parking regulations are now in effect, with residents expressing mixed reactions over implementation, convenience, parking availability, and the impact on daily commuting and residential areas.