മൂവാറ്റുപുഴ: പള്ളിവാസല്‍ ഏലത്തോട്ട എസ്റ്റേറ്റില്‍ ടൂറിസത്തിന്റെ പേര് പറഞ്ഞ് കുത്തകപ്പാട്ട ഭൂമിയില്‍ റോഡ് നിര്‍മ്മാണ പ്രവര്‍ത്തനങ്ങള്‍ നടത്തിയതിനെക്കുറിച്ച് ത്വരിതാന്വേഷണം നടത്തുവാന്‍ മൂവാറ്റുപുഴ വിജിലന്‍സ് ജഡ്ജി പി.മാധവന്‍ ഉത്തരവായി.ദേവിക്കുളം അടിമാലി കൊച്ചുകരിനാട്ടില്‍ സാം.കെ.ജോര്‍ജ്ജ് നല്‍കിയ ഹര്‍ജിയിലാണ് ഉത്തരവായത്. 7.54 ഹെക്ടര്‍ ഭൂമിയിലാണ് ജെസിബി ഉപയോഗിച്ച് വഴി വെട്ടിയത്. മരങ്ങള്‍ മുറിച്ചുമാറ്റുകയും മരങ്ങള്‍ വീഴുന്ന വിധത്തില്‍ മണ്ണ് മാറ്റുകയും ചെയ്തിട്ടുള്ളതായി ഹര്‍ജിക്കാരന്‍ ആരോപിച്ചിട്ടുണ്ട്. പള്ളിവാസല്‍ വി.എന്‍.ആര്‍ എസ്റ്റേറ്റിലാണ് സംഭവം. എസ്റ്റേറ്റ് ഉടമസ്ഥനായ അടൂര്‍ അമ്പാടിയില്‍ ന്യൂബംഗ്ലാവില്‍ സദാനന്ദന്‍ എന്നയാള്‍ക്കെതിരേയും സഹായികളായ റിട്ട. ഡിഎഫ്ഒ കെ.ജെ.സാമുവല്‍, ഏലം സെന്റില്‍മെന്റ് ഓഫീസറും സബ് കളക്ടറുമായ ജി.ആര്‍.ഗോഗുല്‍, പള്ളിവാസല്‍ മുന്‍ വില്ലേജ് ഓഫീസര്‍ വേണു, ദേവികുളം മുന്‍ ഫോറസ്റ്റ് റെയ്ഞ്ച് ഓഫീസര്‍ എന്‍.കെ.അജയഘോഷ്, പള്ളിവാസല്‍ മുന്‍ ഫോറസ്റ്റ് ഓഫീസര്‍ കെ.എം.ഉസ്മാന്‍, റിയല്‍ എസ്റ്റേറ്റ് ഏജന്റ് ബാബു, ദേവികുളം തഹസില്‍ദാര്‍ ടി.എ.നാസ്സര്‍ എന്നിവര്‍ക്കെതിരെയുമാണ് അന്വേഷണം. ഒന്നാം പ്രതിക്കെതിരെ നിരോധന ഉത്തരവുണ്ടെങ്കിലും മറ്റ് പ്രതികള്‍ പണികള്‍ നിര്‍ത്തുവാന്‍ യാതൊരുനടപടിയും എടുത്തില്ല. ഇടുക്കി വിജിലന്‍സ് ആന്റ് ആന്റി കറപ്ഷന്‍ ഡിവൈഎസ്പിയോട് ത്വരിതാന്വേഷണം നടത്തി മെയ് 27നകം റിപ്പോര്‍ട്ട് കോടതി മുമ്പാകെ ഹാജരാക്കുവാനാണ് ഉത്തരവ്.