മുംബൈ: വായ്പാ തട്ടിപ്പ് നടത്തി രാജ്യംവിട്ട വിജയ് മല്യയുടെ കൈവശമുള്ള ബ്രൂവറീസിന്റെ 1000 കോടി രൂപയുടെ മൂല്യമുള്ള ഓഹരികള്‍ വില്‍ക്കാന്‍ കോടതി അനുവാദം നല്‍കി.
കള്ളപ്പണ കേസുകള്‍ കൈകാര്യം ചെയ്യുന്ന സ്‌പെഷല്‍ ജഡ്ജ് എം.എസ് ആസ്മിയാണ് ഉത്തരവിട്ടത്. 2016ല്‍ മല്ല്യ രാജ്യം വിട്ടശേഷം ഇതാദ്യമായാണ് അദ്ദേഹത്തിന്റെ സ്വത്തുക്കള്‍ കണ്ടുകെട്ടാനുള്ള നീക്കം നടക്കുന്നത്.
കോടതി ഉത്തരവിനെ തുടര്‍ന്ന് യുനൈറ്റഡ് ബ്രൂവറിയുടെ ഓഹരികള്‍ രണ്ടു ശതമാനം ഉയര്‍ച്ചയിലാണ് ക്ലോസ് ചെയ്തത്. 1,347.90ലാണ് ഓഹരി ക്ലോസ് ചെയ്തത്.
മല്യയുടെ കൈവശമുള്ള 74,04,932 ഓഹരികളുടെ മൂല്യം ഏകദേശം 999 കോടി രൂപയാണ്. കോടതി നിയമിച്ച ലിക്വിഡേറ്ററിന് ഈ മാസം ആദ്യം ഡെറ്റ് റിക്കവറി ട്രിബ്യൂണല്‍ യുനൈറ്റഡ് ബ്രൂവറീസിന്റെ 7.4 മില്യണ്‍ ഓഹരികള്‍ കൈമാറിയിരുന്നു.