മലപ്പുറം: രാജ്യം ഒറ്റക്കെട്ടാവേണ്ട സമയത്തും ബി.ജെ.പി സര്‍ക്കാര്‍ ശ്രമിക്കുന്നത് ഭിന്നിപ്പിച്ച് ഭരിക്കാനാണെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി. മുസ്‌ലിംലീഗ് സംഘടിപ്പിച്ച മനുഷ്യാവകാശ സംരക്ഷണ ദിനാചരണം മലപ്പുറത്ത് ഉദ്ഘാടനം ചെയ്യുകയായിരുന്നു അദ്ദേഹം.
ചൈനയും പാകിസ്താനുമുള്‍പ്പെടെ ശത്രുരാഷ്ട്രങ്ങള്‍ ഇന്ത്യാമഹാരാജ്യത്തിനെതിരേ പടവാളെടുക്കുന്ന നേരത്ത് ജനങ്ങളെ ചേര്‍ത്ത് നിര്‍ത്താനാണ് സര്‍ക്കാറുകള്‍ ശ്രമിക്കേണ്ടത്. എന്നാല്‍ ഇന്ത്യയില്‍ ഇപ്പോഴും നടക്കുന്നത് ന്യൂനപക്ഷ പിന്നാക്ക ദലിത് വേട്ടയാണ്. ഡല്‍ഹിയിലെ വര്‍ഗീയ കലാപം യാദൃശ്ചികമായി പൊട്ടിപ്പുറപ്പെട്ടതായിരുന്നില്ല. ബി.ജെ.പി അവരുടെ വര്‍ഗീയ അജന്‍ഡ നടപ്പിലാക്കുകയായിരുന്നു. സി.എ.എ, എന്‍.ആര്‍.സി പ്രക്ഷോഭ പരിപാടികളെ തകര്‍ക്കുകയായിരുന്നു ലക്ഷ്യം.
കലാപാനന്തരമുള്ള ഡല്‍ഹിയുടെ അവസ്ഥ വളരെ പരിതാപകരമാണ്. പൗരത്വ സമരത്തിന് നേതൃത്വം വഹിച്ച വിദ്യാര്‍ഥികളെയും ചെറുപ്പക്കാരെയും ഡല്‍ഹി വര്‍ഗീയാക്രമണകേസിന്റെ ഗൂഢാലോചനയില്‍ പ്രതിചേര്‍ത്ത് വ്യാപകമായി ജയിലിലടക്കല്‍ തുടരുകയാണ്. രാജ്യത്തെ ജനങ്ങളോട് കാണിക്കുന്ന ഈ ഇരട്ടനീതിക്കെതിരേയാണ് മുസ്‌ലിം ലീഗ് സമരമുഖത്തേക്കിറങ്ങുന്നത്. രാജ്യവ്യാപകമായി നടക്കുന്ന പ്രതിഷേധം മോദി സര്‍ക്കാറിനെതിരേയുള്ള താക്കീതാവുമെന്നും അദ്ദേഹം പറഞ്ഞു. ചടങ്ങില്‍ പാണക്കാട് സയ്യിദ് ഹമീദലി ശിഹാബ് തങ്ങള്‍ അധ്യക്ഷനായി.