മലപ്പുറം: സാഫ് ഫുട്‌ബോള്‍ ചാംപ്യന്‍ഷിപ്പിനുള്ള ഇന്ത്യന്‍ ടീമിലേക്കുള്ള തെരഞ്ഞെടുപ്പിനു മലപ്പുറത്തു നിന്നും രണ്ടുപേര്‍. ടീമിനെ തെരഞ്ഞെടുക്കുന്നതിനു മുന്നോടിയായി ഡല്‍ഹിയില്‍ നടക്കുന്ന ക്യാംപില്‍ നിലവിലെ അന്തര്‍ദേശീയ താരം ആഷിഖ് കുരുണിയന് പുറമെ ഗോകുലം എഫ്.സി മിഡ്ഫീല്‍ഡര്‍ അര്‍ജുന്‍ ജയരാജും ക്ഷണമെത്തി.
28 മുതല്‍ ഡല്‍ഹിയിലാണ് ക്യാംപ്. ആകെ 34 അംഗങ്ങളെയാണ് ക്യാംപിലേക്ക് തെരഞ്ഞെടുക്കപ്പെട്ടത്. ഇതിലെ നാലു മലയാളി താരങ്ങളില്‍ രണ്ടുപേരാണ് ആഷിഖും അര്‍ജുന്‍ ജയരാജും.ആഷിഖിനൊപ്പം മലപ്പുറം എം.എസ്.പി ഹയര്‍ സെക്കന്‍ഡറി സ്‌കൂളിന് വേണ്ടി കളിച്ചിട്ടുണ്ട്.ഗോകുലത്തിന് വേണ്ടി ഐ ലീഗിലും കേരള പ്രീമിയര്‍ ലീഗിലും മികച്ച പ്രകടനവും നടത്തി. കെ. ഷാജിറുദ്ദീനാണ് പരിശീലകന്‍. കെ.എസ്.ആര്‍.ടി.സി ഡ്രൈവര്‍ തൃക്കലങ്ങോട് സ്വദേശി ജയരാജിന്റെയും ജ്യോതിയുടെയും മകനാണ്. മഞ്ചേരി എന്‍.എസ്.എസ് കോളജില്‍ അവസാന വര്‍ഷ ബി.കോം വിദ്യാര്‍ഥിയാണ്.