തിരുവനന്തപുരം: വഞ്ചിയൂര്‍ സബ്ട്രഷറിയിലെ പണം തിരിമറിക്കുപിന്നാലെ തിരുവനന്തപുരം ജില്ലാ ട്രഷറിക്കെതിരേയും ആരോപണം. കെട്ടിട നിര്‍മാണത്തൊഴിലാളി ക്ഷേമനിധിയുടെ അക്കൗണ്ടിലുണ്ടായിരുന്ന 6.72 കോടി രൂപ കാണാനില്ലെന്ന് ക്ഷേമനിധി ബോര്‍ഡ് ഡയരക്ടര്‍ കെ.പി തമ്പി കണ്ണാടന്‍  ആരോപിച്ചു. ഇതുസംബന്ധിച്ച് ട്രഷറി അധികൃതര്‍ക്ക് പരാതി നല്‍കിയെങ്കിലും വ്യക്തമായ മറുപടി ലഭിച്ചിട്ടില്ലെന്നും തുടര്‍ന്ന് ധനമന്ത്രിക്ക് പരാതി നല്‍കിയതായും അദ്ദേഹം പറഞ്ഞു.

 

ക്ഷേമനിധിയുടെ അക്കൗണ്ടില്‍  നിക്ഷേപിച്ചിരുന്ന 25.98 കോടിയില്‍ നിന്നാണ് 6.72 കോടി രൂപ കാണാതായത്. 2019ല്‍ ഇത് ബോര്‍ഡിന്റെ ശ്രദ്ധയില്‍പ്പെട്ടതിനെ തുടര്‍ന്ന് നടത്തിയ അന്വേഷണത്തില്‍  ട്രഷറിയിലെ ക്ഷേമനിധിയുടെ അക്കൗണ്ടിലെ സ്റ്റേറ്റ്‌മെന്റുകള്‍ മുഴുവന്‍ നീക്കംചെയ്തതായി കണ്ടെത്തി. തുടര്‍ന്ന് ട്രഷറി ഓഫിസര്‍ക്ക് കത്തുനല്‍കി സ്റ്റേറ്റ്‌മെന്റ് ആവശ്യപ്പെട്ടപ്പോള്‍ നേരത്തെ ലഭിച്ചതുമായി യാതൊരു ബന്ധവുമില്ലാത്ത സ്റ്റേറ്റ്‌മെന്റാണ് നല്‍കിയത്.  ബില്ലുകള്‍ മാറുമ്പോഴുള്ള രേഖകളും ശരിയായ രീതിയിലായിരുന്നില്ല. തുടര്‍ന്നാണ് ധനമന്ത്രിക്ക് പരാതി നല്‍കിയതെന്നും തമ്പി കണ്ണാടന്‍ പറഞ്ഞു.