കോഴിക്കോട്: ജില്ലാ പഞ്ചായത്തിന്റെ ആഭിമുഖ്യത്തില്‍ പ്രവര്‍ത്തിച്ചുവരുന്ന 'സ്‌നേഹസ്പര്‍ശം' പദ്ധതിയില്‍ കിഡ്‌നിരോഗം ബാധിച്ച് ഹീമോ ഡയാലിസിസ് ചെയ്തുവരുന്ന രോഗികള്‍ക്കുള്ള സാമ്പത്തികസഹായം വര്‍ധിപ്പിച്ചു. ഒരു ഡയാലിസിസിന് 250 രൂപവീതം പ്രതിമാസം പത്ത് ഡയാലിസിസുകള്‍ക്കാണ് സഹായം നല്‍കിക്കൊണ്ടിരുന്നത്. സഹായം ഇനി പ്രതിമാസം 12 ഡയാലിസിസിന് നല്‍കും. ജില്ലാ പഞ്ചായത്തില്‍ ചേര്‍ന്ന സ്‌നേഹസ്പര്‍ശം എക്‌സിക്യുട്ടീവ് യോഗത്തിലാണ് തീരുമാനമുണ്ടായത്. മാസത്തില്‍ പതിമൂന്ന് തവണയാണ് രോഗികള്‍ക്ക് ഡയാലിസിസ് ചെയ്യേണ്ടിവരുന്നത്. ഹീമോ ഡയാലിസിസിനു മാത്രം എഴുന്നൂറിലധികം രോഗികള്‍ക്ക് സ്‌നേഹസ്പര്‍ശത്തിലൂടെ പ്രതിമാസം സഹായം ലഭിച്ചുവരുന്നുണ്ട്.