ചെറുപുഴ: കാക്കടവ് ചെമ്മരംകയം കമ്പിപ്പാലം അപകടാവസ്ഥയിലായി. പാലം താങ്ങി നിര്‍ത്തുന്ന സ്റ്റേ കമ്പികള്‍ മിക്കവയും തുരുമ്പെടുത്ത് നശിച്ചു കഴിഞ്ഞു.
വെസ്റ്റ് എളേരി പഞ്ചായത്തിലെ ചെമ്മരം കയത്തിലെയും പെരിങ്ങോം-വയക്കര പഞ്ചായത്തിലെ മുണ്ടരാനത്തെയും തമ്മില്‍ ബന്ധിപ്പിക്കുന്ന ഈ പാലത്തിന് 20 വര്‍ഷത്തെ പഴക്കമുണ്ട്. പാലത്തിലെ ഇരുമ്പ് പലകകള്‍ ഘടിപ്പിച്ചിട്ടുള്ള കമ്പികള്‍ താഴെ വീഴാതിരിക്കാന്‍ ഇരുവശങ്ങളിലും സ്ഥാപിച്ച ഇരുമ്പ് വലകളും പൂര്‍ണമായും തകര്‍ന്നു.
ഈ പാലത്തിലൂടെയാണ് മുണ്ടറാനം പ്രദേശത്തുള്ള വിദ്യാര്‍ഥികള്‍ കമ്പല്ലൂര്‍ സ്‌കൂളിലേക്ക് പോകുന്നത്. ഇരുപഞ്ചായത്തുകളും തങ്ങളുടെ ആവശ്യം ചെവികൊള്ളുന്നില്ലെന്നാണ് നാട്ടുകാരുടെ പരാതി.
കഴിഞ്ഞ ദിവസം തൃക്കരിപ്പൂര്‍ എം.എല്‍.എ എം രാജഗോപാലന്‍ സ്ഥലം സന്ദര്‍ശിച്ചിരുന്നു.
മഴക്കാലത്തിനു മുന്‍പേ പാലത്തിന്റെ അറ്റകുറ്റപ്പണി നടത്തിയില്ലെങ്കില്‍ അപകടം സംഭവിക്കാമെന്ന ആശങ്കയിലാണ് നാട്ടുകാര്‍.