ജിദ്ദ: സഊദിയിൽ സ്വദേശിവത്ക്കരണം ശക്തമായി നടക്കുമ്പോൾ വിദേശികളെ റിക്രൂട്ട്‌ ചെയ്യുന്നത്‌ എളുപ്പമാക്കാൻ സഊദി ലേബർ അറ്റാഷെമാരെ നിയമിക്കുന്നു.
ഇന്ത്യ, പാകിസ്ഥാൻ,ബംഗ്ലാദേശ്‌, ഫിലിപൈൻസ്‌, ഇന്തൊനേഷ്യ, ശ്രീലങ്ക, ഈജിപ്ത്‌ എന്നീ രാജ്യങ്ങളിലേക്കാണു ലേബർ അറ്റാഷെമാരെ നിയമിക്കുന്നത്‌.
ഇതിന്റെ ആദ്യ ഘട്ടമെന്നോണം ഫിലിപൈൻസിലേക്കുള്ള ലേബർ അറ്റാഷെയായി മുഹമ്മദ്‌ ബിൻ ഉബൈദുല്ല അൽ മുതൈരി നിയമിതനായി.സഊദി ചരിത്രത്തിൽ ആദ്യമായാണു വിദേശത്ത് ഒരു ലേബർ അറ്റാഷെയെ നിയമിക്കുന്നത്‌.സഊദിയിലേക്കുള്ള വിദേശികളുടെ റിക്രൂട്ട്‌മന്റ്‌ കാര്യങ്ങൾ എളുപ്പമാക്കുക, അവർ സഊദി തൊഴിൽ വിപണിയിലേക്ക്‌ അനുയോജ്യരാണോ എന്നത്‌ പരിശോധനക്ക്‌ വിധേയമാക്കുക തുടങ്ങിയ കാര്യങ്ങളെല്ലാം ലേബർ അറ്റാഷെ കൈകാര്യം ചെയ്യും.
അതേ സമയം വിദേശികളുടെ റിക്രൂട്ടിങ്ങിന് കൂടുതൽ നിയന്ത്രണമേർപ്പെടുത്താനും സഊദി തൊഴില്‍ മന്ത്രാലയം തീരുമാനിച്ചു. റിക്രൂട്ടിങ് രംഗത്തെ വിദഗ്‌ധ സ്ഥാപനവുമായി കരാറുണ്ടാക്കും.
ലോകത്ത് വിദേശ ജോലിക്കാരെ അവലംബിക്കുന്നതിലും റിക്രൂട്ട് ചെയ്യുന്നതിലും നാലാം സ്ഥാനത്താണ് സഊദി അറേബ്യയുടെ സ്ഥാനം. ബ്രിട്ടൻ, റഷ്യ, ജർമ്മനി എന്നീ രാജ്യങ്ങളാണ് സഊദിക്ക് മുന്നിലുള്ളത്. 70 ലക്ഷത്തിലധികം വിദേശികൾ സഊദിയിൽ തൊഴിലെടുക്കുന്നുണ്ടെന്നാണ് കണക്ക്. ഇതിൽ 27 ലക്ഷത്തോളം ഇന്ത്യക്കാരാണ്. രാജ്യത്തെ 86 ശതമാനം കുടുംബങ്ങളിൽ ഹൌസ് ഡ്രൈവർമാരും 68 ശതമാനം വീടുകളിൽ വീട്ടു വേലക്കാരും ജോലി ചെയ്യുന്നുണ്ട്.