ശ്രീകാര്യം: നന്മയുടെയും ജനസേവനത്തിന്റെയും ഉത്തമ മാതൃകയായി മാറുകയാണ് തുമ്പ പൊലിസ്. തെറ്റിയാര്‍ തോട് കരകവിഞ്ഞതിനെ തുടര്‍ന്ന് പൂര്‍ണമായി തകര്‍ന്നുവീണ വീട്ടില്‍ ഒറ്റപ്പെട്ട നിര്‍ദ്ധന കുടുംബത്തിന് കിടപ്പാടമൊരുക്കിയാണ് പൊലിസ് മാതൃകയാകുന്നത്. കുളത്തൂര്‍ പൗണ്ടുകടവ് പുലിമുട്ടം നാല്‍പതടി പാലത്തിന് സമീപം നസീമ ബീവിക്കാണ് വീട് നിര്‍മിച്ചുനല്‍കുന്നത്. വര്‍ഷങ്ങള്‍ക്ക് മുന്‍പേ ഭര്‍ത്താവ് ഉപേക്ഷിച്ചുപോയ ഇവര്‍ ഭിന്നശേഷിക്കാരിയായ സഹോദരിക്കും മകനുമൊപ്പമാണ് താമസിച്ചിരുന്നത്.
നിത്യവൃത്തിക്കുപോലും നിവൃത്തിയില്ലാതെ ദയനീയ അവസ്ഥയിലായിരുന്ന കുടുംബത്തിന് കിടപ്പാടം കൂടി നഷ്ടപ്പെട്ടതോടെ തെരുവിലായ അവസ്ഥയിലായിരുന്നു. ദുരിതാശ്വാസ ക്യാംപായിരുന്നു ഏക ആശ്വാസം. പ്രളയ ഭീഷണികള്‍ മാറി ക്യാംപിന്റെ പ്രവര്‍ത്തനം അവസാനിച്ചതോടെ ബുദ്ധിമുട്ടിലായ കുടുംബത്തിന്റെ സങ്കടകഥയറിഞ്ഞ തുമ്പ എസ്.ഐ സി. പ്രതാപ ചന്ദ്രനാണ് സഹായഹസ്തവുമായി മുന്നോട്ടുവന്നത്. തുമ്പ പൊലിസ് സ്റ്റേഷനിലെ മുഴുവന്‍ പൊലിസ് ഉദ്യോഗസ്ഥരുടെയും സാമ്പത്തിക സഹായത്തോടെ 800 സ്‌ക്വൊയര്‍ ഫീറ്റില്‍ ഒരു നിലവീടാണ് കുടുംബത്തിനായി നിര്‍മിച്ചുനല്‍കുന്നത്. എസ്.ഐയുടെയും നാട്ടുകാരുടെയും നേതൃത്വത്തില്‍ വീടിന്റെ കുറ്റിയടിക്കലും കുഴിയെടുക്കലും കഴിഞ്ഞു.
വീടിന്റെ തറക്കല്ലിടല്‍ കര്‍മ്മം ഇന്നലെ രാവിലെ കഴക്കൂട്ടം സൈബര്‍ സിറ്റി അസിസ്റ്റന്റ് കമ്മിഷണര്‍ ആര്‍. അനില്‍കുമാര്‍ നിര്‍വഹിച്ചു. വാര്‍ഡ് കൗണ്‍സിലര്‍മാരായ മേടയില്‍ വിക്രമന്‍, എസ്. ശിവദത്ത്, തുമ്പ എസ്.ഐ സി. പ്രതാപ ചന്ദ്രന്‍, അഡീഷനല്‍ എസ്.ഐ ശ്യാം ജെ. നായര്‍, സ്‌പെഷ്യല്‍ ബ്രാഞ്ച് എ.എസ്.ഐ വിനോദ്, എ.എസ്.ഐമാരായ സുരേഷ്‌കുമാര്‍, ബിജു ആന്റണി, സി.പി.ഒമാരായ സാദത്ത്, അരുണ്‍, വിവേക്, നവാസ്, എസ്.സി.പി.ഒ മാരായ രാജേഷ്, ജയകൃഷ്ണന്‍, ബിനു പങ്കെടുത്തു.
പന്ത്രണ്ട് ലക്ഷത്തോളം രൂപ ചിലവ് കണക്കാക്കുന്ന വീടിന്റെ നിര്‍മാണത്തിന് പൊലിസ് ഉദ്യോഗസ്ഥരെ കൂടാതെ സുമനസുകളുടെ സഹായവും പ്രതീക്ഷിക്കുന്നതായി തുമ്പ എസ്.ഐ പറഞ്ഞു.