തിരുവനന്തപുരം: കള്ളവോട്ട് ചെയ്തവരെ സംരക്ഷിക്കില്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. കള്ളവോട്ട് ചെയ്യാന്‍ സി.പി.എം ആരോടും പറഞ്ഞിട്ടില്ല. ആള്‍മാറാട്ടം നടത്തി വോട്ട് ചെയ്തവര്‍ക്കെതിരേ കേസെടുക്കണം.
കുറ്റക്കാരായ ആരെയും പാര്‍ട്ടി സംരക്ഷിക്കില്ല. പോസ്റ്റല്‍ വോട്ടിന്റെ കാര്യത്തില്‍ മാര്‍ഗനിര്‍ദേശങ്ങള്‍ക്ക് വിരുദ്ധമായ ഒന്നും പാര്‍ട്ടി ആവശ്യപ്പെട്ടിട്ടില്ല. ഇക്കാര്യത്തിലും തെറ്റ് ചെയ്തവര്‍ ശിക്ഷിക്കപ്പെടണം. അടൂര്‍ പ്രകാശിന് വേണ്ടി പൊലിസുകാര്‍ വോട്ട് ചോദിച്ചതും പുറത്തുവന്നിട്ടുണ്ട്.10 ലക്ഷം പേരെ വോട്ടര്‍പട്ടികയില്‍ നിന്ന് ഒഴിവാക്കിയെന്ന ഉമ്മന്‍ചാണ്ടിയുടെ ആരോപണം തോല്‍വി മുന്നില്‍ക്കണ്ടുള്ള മുന്‍കൂര്‍ ജാമ്യമാണെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.

'മീണയെ മുഖ്യമന്ത്രി അനുകൂലിച്ചതില്‍ തെറ്റില്ല'

തിരുവനന്തപുരം: ടിക്കാറാം മീണയെ മുഖ്യമന്ത്രി അനുകൂലിച്ചതില്‍ തെറ്റില്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍.
ടിക്കാറാം മീണ ഇല്ലാത്ത അധികാരം ഉപയോഗിക്കാന്‍ ശ്രമിച്ചതിനെയാണ് എതിര്‍ത്തത്. കള്ളവോട്ടിന്റെ പേരില്‍ പഞ്ചായത്ത് അംഗത്തെ അയോഗ്യയാക്കണമെന്ന അദ്ദേഹത്തിന്റെ ശുപാര്‍ശ നിയമവിരുദ്ധമാണ്. സംസ്ഥാന തെരഞ്ഞടുപ്പ് കമ്മിഷനും ഇക്കാര്യം സ്ഥിരീകരിച്ചതാണെന്നും കോടിയേരി പറഞ്ഞു.