ടോക്കിയോ: ജപ്പാനിലെ പഴക്കമേറിയ നാരാ ജയില്‍ ഇനി ആഡംബര ഹോട്ടല്‍. 2021ലാണിത് ഹോട്ടലായി വീണ്ടും തുറക്കുന്നത്. ഹോന്‍ഷി ദ്വീപിലെ നാരാസിറ്റിയിലുള്ള ഈ ജയില്‍ 1901-1908 കാലയളവിലാണ് നിര്‍മിച്ചത്. 1909ല്‍ തുറക്കുകയും ചെയ്തു. എട്ടാം നൂറ്റാണ്ടില്‍ ജപ്പാന്റെ തലസ്ഥാനമായിരുന്നു നാരാ. മെയ്ജി ഭരണകൂടം ചുവന്ന ഇഷ്ടികകളില്‍ പണിത ഇത്തരം പത്തു നിര്‍മിതികളില്‍ അവശേഷിച്ച ഏക ജയിലാണിത്. 1,06,000 ച.കി.മീ വിസ്തൃതിയുള്ള ഈ ജയില്‍ പിന്നീട് കൂടുതല്‍ വിശാലമാക്കി. 1946 മുതല്‍ 2017ല്‍ പൂട്ടുന്നതുവരെ ഇത് ജുവനൈല്‍ ജയിലായിരുന്നു.
15 ബില്യന്‍ യെന്‍(136.6 മില്യന്‍ യു.എസ് ഡോളര്‍) ചെലവിലാണിത് ആഡംബര ഹോട്ടലാക്കി മാറ്റുന്നത്. ഡസന്‍ കണക്കിനു റൂമുകളും മറ്റു സൗകര്യങ്ങളും ഇതിലുണ്ട്. പൈതൃകങ്ങള്‍ കളയാതെ നൂറിലേറെ വര്‍ഷം പഴക്കമുള്ള ഒരു ജയില്‍ ഹോട്ടലാക്കി മാറ്റുക ഏറെ ശ്രമകരമായിരുന്നെന്ന് റിസോര്‍ട്ട് ഉടമകള്‍ പറഞ്ഞു.