കണ്ണൂര്‍: യുവതിയെ വിവാഹ വാഗ്ദാനം നല്‍കി ഗര്‍ഭിണിയാക്കി നിര്‍ബന്ധിച്ച് ഗര്‍ഭഛിദ്രം നടത്തിയെന്ന പരാതിയില്‍ അഭിഭാഷകനെതിരേ കണ്ണൂര്‍ ടൗണ്‍ പൊലിസ് കേസെടുത്തു.
എടച്ചൊവ്വയിലെ ആറുകണ്ടി വീട്ടില്‍ നിര്‍മല്‍കുമാറി(45)നെതിരേയാണ് ആന്ധ്ര വിശാഖപട്ടണം സ്വദേശിയായ യുവതി പരാതി നല്‍കിയത്. കണ്ണൂരില്‍ ഭാര്യയും ഒരു കുട്ടിയുമുള്ള അഭിഭാഷകന്‍ ദുബൈ കരാമയിലെ ഒരു ലിഫ്റ്റ് കമ്പനിയിലാണ് ജോലി. ഇതേ കമ്പനിയില്‍ സെയില്‍സ് കോഓഡിനേറ്ററാണ് പരാതിക്കാരി. കഴിഞ്ഞ 19നാണ് യുവതി കണ്ണൂരിലെത്തി ടൗണ്‍ സ്‌റ്റേഷനില്‍ പരാതി നല്‍കിയത്. നിര്‍മലിന്റെ എടച്ചൊവ്വയിലെ വീട്ടില്‍ പോയപ്പോള്‍ യുവതിയെ പ്രതിയുടെ അമ്മയും സഹോദരിമാരും ചേര്‍ന്ന് ക്രൂരമായി മര്‍ദിച്ചതായും പരാതിയുണ്ട്. നിര്‍മല്‍ ഇപ്പോള്‍ ദുബൈയിലാണ്. കണ്ണൂരില്‍ തന്നെ മറ്റൊരു ബന്ധവും ഉണ്ടായതായി പൊലിസിന് വിവരം ലഭിച്ചിട്ടുണ്ട്. പരാതിയില്‍ കേസെടുത്ത ടൗണ്‍ പൊലിസ് അഭിഭാഷകനെ നാട്ടിലെത്തിക്കാനുള്ള നടപടികള്‍ തുടങ്ങി.