ന്യൂഡല്‍ഹി: പത്മനാഭസ്വാമി ക്ഷേത്രം എക്‌സിക്യൂട്ടീവ് ഓഫിസര്‍ സ്ഥാനത്തുനിന്ന് കെ.എന്‍ സതീഷിനെ മാറ്റും. രാജകുടുംബവും ക്ഷേത്ര ഭരണസമിതിയും എതിര്‍പ്പുമായി രംഗത്തെത്തിയതാണ് സതീഷിന് വിനയായത്. എതിര്‍പ്പ് ഇരുപക്ഷവും ശ്രദ്ധയില്‍പ്പെടുത്തിയതോടെ കഴിഞ്ഞദിവസം ഒത്തുതീര്‍പ്പ് ചര്‍ച്ചക്ക് സുപ്രിംകോടതി വഴിയൊരുക്കിയിരുന്നു. എന്നാല്‍, എതിര്‍പ്പ് രൂക്ഷമായതോടെ സതീഷ് ഒഴിയാന്‍ സന്നദ്ധത പ്രകടിപ്പിക്കുകയായിരുന്നു. ക്ഷേത്ര കുള നവീകരണം കഴിയുന്നതുവരെ സതീഷ് തുടരട്ടെയെന്നും ഭരണസമിതി അധ്യക്ഷ എക്‌സിക്യൂട്ടീവ് ഓഫിസറുടെ അധിക ചുമതല വഹിക്കട്ടെയെന്നുമായിരുന്നു രാജകുടുംബത്തിന്റെ നിര്‍ദേശം. ഇതിനെ ഭരണസമിതിയും അനുകൂലിച്ചെങ്കിലും സംസ്ഥാന സര്‍ക്കാര്‍ എതിര്‍ത്തു. പുതിയ ഉദ്യോഗസ്ഥന്‍ എക്‌സിക്യൂട്ടീവ് ഓഫിസറായി വരണമെന്നാണ് സര്‍ക്കാരിന്റെ നിലപാട്.
ഹൗസിങ് ബോര്‍ഡ് കമ്മിഷണര്‍ എസ് കാര്‍ത്തികേയന്‍, സിവില്‍ സപ്ലൈസ് ഡയറക്ടര്‍ വി രതീശന്‍, സഹകരണ വകുപ്പ് സ്‌പെഷല്‍ സെക്രട്ടറി പി വേണുഗോപാല്‍ എന്നീ മൂന്ന് ഉദ്യോഗസ്ഥരുടെ പേരുകളാണ് സംസ്ഥാന സര്‍ക്കാര്‍ മുന്നോട്ടുവച്ചത്. കേസിലെ അമിക്കസ്‌ക്യൂറിയായ ഗോപാല്‍ സുബ്രഹ്മണ്യം റിട്ടയേര്‍ഡ് ഐ.എ.എസ് ഉദ്യോഗസ്ഥനായ ആര്‍.കണ്ണന്‍, മുന്‍ ചീഫ് സെക്രട്ടറി നീല ഗംഗാധരന്‍ എന്നീ രണ്ട് പേരുകളും സമര്‍പ്പിച്ചു. ഈ പേരുകളില്‍നിന്ന് യോജിച്ച ഉദ്യോഗസ്ഥനെ കണ്ടെത്താന്‍ സാധിച്ചില്ല. ഈ സാഹചര്യത്തില്‍ സുപ്രിം കോടതി പേര് നിര്‍ദേശിക്കട്ടെയെന്ന തീരുമാനത്തിലെത്തുകയായിരുന്നു. പട്ടിക സുപ്രിം കോടതി ഇന്ന് പരിഗണിക്കും.