തിരുവനന്തപുരം: കേരള കോണ്‍ഗ്രസു(എം)മായും കെ.എം.മാണിയുമായും ഇനി യാതൊരുവിധ നീക്കുപോക്കിനുമില്ലെന്നും മാണിയോടുള്ള നിലപാടില്‍ വിട്ടുവീഴ്ച വേണ്ടെന്നും കെ.പി.സി.സി രാഷ്ട്രീയകാര്യസമിതി തീരുമാനിച്ചതായി കെ.പി.സി.സി പ്രസിഡന്റ് എം.എം. ഹസന്‍.
കോട്ടയം ജില്ലാ പഞ്ചായത്തില്‍ കോണ്‍ഗ്രസുമായി രേഖാമൂലമുണ്ടാക്കിയ ധാരണ ലംഘിച്ച് മാണി സി.പി.എമ്മിന്റെ പിന്തുണ സ്വീകരിച്ചതു കൊടിയ രാഷ്ട്രീയവഞ്ചനയാണ്. ഈ അട്ടിമറിക്ക് നേതൃത്വം നല്‍കിയത് ജോസ് കെ.മാണിയും അതിന് അനുവാദം നല്‍കിയത് കെ.എം. മാണിയുമാണ്. ഈ നടപടിയില്‍ ശക്തമായ പ്രതിഷേധമുള്ളവരാണ് കേരള കോണ്‍ഗ്രസുകാര്‍.
അവസരവാദപരമായ നിലപാടുകള്‍ ശരിയല്ലെന്ന് ആ പാര്‍ട്ടിക്കുള്ളില്‍ തന്നെ അഭിപ്രായം ഉയര്‍ന്നുവന്നു. മാണിയെ യു.ഡി.എഫില്‍ വേണ്ടെന്നും ഇനി ഒരു കൂട്ടുകെട്ടും അംഗീകരിക്കില്ലെന്നുമുള്ള കോട്ടയം ഡി.സി.സിയുടെ പ്രമേയത്തിന് രാഷ്ട്രീയകാര്യസമിതി അംഗീകാരം നല്‍കിയതായും അദ്ദേഹം പറഞ്ഞു. മാണിയും ജോസ് കെ.മാണിയുമുള്ള കേരള കോണ്‍ഗ്രസുമായി ഒരു ബന്ധവും പാടില്ലെന്നാണ് ഉമ്മന്‍ചാണ്ടി കൂടി പങ്കെടുത്ത കോട്ടയം ഡി.സി.സിയുടെ പ്രമേയം.
ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പില്‍ ഉണ്ടാക്കിയ കരാറിനെ അട്ടിമറിച്ച് സി.പി.എം പിന്തുണയോടെ കേരള കോണ്‍ഗ്രസ് സ്ഥാനാര്‍ഥി വിജയിച്ചത് വന്‍ വിവാദമായിരുന്നു. മാണിയെ യു.ഡി.എഫിലേക്ക് തിരികെ കൊണ്ടുവരണമെന്ന പി.ജെ. കുര്യന്റെ അഭിപ്രായം വ്യക്തിപരം മാത്രമാണെന്ന് ചോദ്യത്തിന് ഉത്തരമായി ഹസന്‍ പറഞ്ഞു.