ചങ്ങനാശേരി: സ്വര്‍ണ കള്ളക്കടത്തും ലഹരിക്കടത്തുമാണ് എല്‍.ഡി.എഫ് സര്‍ക്കാരിന്റെ പ്രധാന നേട്ടങ്ങളെന്നും ഈ വിഷയത്തില്‍ മുഖ്യമന്ത്രി പൊട്ടന്‍ കളിക്കുകയാണെന്നും യു.ഡി.എഫ് കണ്‍വീനര്‍ എം.എം.ഹസന്‍. എന്‍.എസ്.എസ്. ആസ്ഥാനത്ത് ജി.സുകുമാരന്‍നായരെ സന്ദര്‍ശിച്ചശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം.
എല്‍.ഡി.എഫ് സര്‍ക്കാര്‍ നേരിടുന്ന പ്രശ്‌നങ്ങളില്‍ സീതാറാം യെച്ചൂരിയുടെ നിലപാട് പരിഹാസ്യമാണ്. കേരളത്തില്‍ നടക്കുന്നത് അഴിമതി രാജാണ്. കൊറോണയെ അഴിമതിയുടെ കൊയ്ത്തു കാലമാക്കി സര്‍ക്കാര്‍ മാറ്റിയിരിക്കുക യാണെന്നും അദ്ദേഹം ആരോപിച്ചു. എന്‍.എസ്.എസില്‍ വന്നത് തികച്ചും സൗഹൃദ സന്ദര്‍ശനത്തിനാണെന്നും യു.ഡി.എഫിന്റെ എല്ലാ പ്രവര്‍ത്തനങ്ങള്‍ക്കും സഹായം അഭ്യര്‍ത്ഥിക്കാനാണ് വന്നതെന്നും അദ്ദേഹം പറഞ്ഞു. എന്‍.എസ്.എസുമായി എക്കാലത്തും ഊഷ്മള ബന്ധമാണുള്ളത്. ജോസ്.കെ.മാണി മുന്നണി വിട്ടതും, സിറോ മലബാര്‍ സഭയുടെ പ്രതികരണവും തെരഞ്ഞെടുപ്പിനെ ബാധിക്കില്ലെന്നും ഹസന്‍ പറഞ്ഞു. സാമ്പത്തികസംവരണ വിഷയത്തില്‍ കത്തോലിക്കാസഭയുടെ വിമര്‍ശനത്തിന് മറുപടി പറയാനില്ലന്നും അദ്ദേഹം പറഞ്ഞു. എം.എല്‍.എമാരായ തിരുവഞ്ചൂര്‍ രാധാകൃഷ്ണന്‍, കെ.സി.ജോസഫ് എന്നിവരും ഒപ്പമുണ്ടായിരുന്നു.