ന്യൂഡല്‍ഹി: സുഹൃത്തിനെ ക്രൂരമായി കൊലപ്പെടുത്തിയ ശേഷം മൃതദേഹം റെയില്‍വേ ട്രാക്കില്‍ ഉപേക്ഷിച്ച പ്രതി ഗുല്‍കേഷ് അറസ്റ്റില്‍. സുഹൃത്തിന്റെ ഭാര്യയെ സ്വന്തമാക്കാനാണ് പ്രതി കൊല നടത്തിയത്.

ഗുല്‍കേഷ് തന്റെ സുഹൃത്ത് ദല്‍ബിര്‍നെ ഫോണില്‍ വിളിച്ച് വരുത്തി റെയില്‍വേ പാളത്തിനടുത്തേക്ക് കൂട്ടിക്കൊണ്ടു പോവുകയായിരുന്നു. ഇഷ്ടിക കൊണ്ട് തലയ്ക്കടിച്ച് കൊന്ന ശേഷം ഇയാളുടെ ശരീരം റെയില്‍വേ ട്രാക്കില്‍ ഉപേക്ഷിക്കുകയും ചെയ്തു. റെയില്‍വേ ട്രാക്കില്‍ അജ്ഞാത മൃതദേഹം കണ്ടെന്ന് പ്രതി തന്നെയാണ് പൊലിസില്‍ അറിയിച്ചത്.

പൊലിസ് നടത്തിയ അന്വേഷണത്തിലാണ് പ്രതി ഇയാള്‍തന്നെയാണെന്ന് തിരിച്ചറിഞ്ഞത്. ദല്‍ബിറിന്റെ ഭാര്യയെ സ്വന്തമാക്കാനാണ് താന്‍ കൃത്യം നടത്തിയതെന്ന് ഇയാള്‍ പൊലിസിനോട് വെളിപ്പെടുത്തി. കൊലപാതകത്തില്‍ ദല്‍ബിറിന്റെ ഭാര്യയ്ക്ക് പങ്കുണ്ടോയെന്ന് അന്വേഷിച്ച് വരികയാണെന്നും പൊലിസ് പറഞ്ഞു.