തലശ്ശേരി: സ്ത്രീ സുരക്ഷക്കായി പൊലിസ് ഇറക്കിയ പിങ്ക് പട്രോള്‍ കാറില്‍ വനിതാ കോണ്‍സ്റ്റബിള്‍മാരുടെ ഡ്രൈവിങ് പരീശിലനം. പിങ്ക് പട്രോള്‍ പദ്ധതിക്കു വേണ്ടി ജില്ലയ്ക്ക് അനുവദിച്ച രണ്ടാമത്തെ കാറിലാണ് ധര്‍മടം ബീച്ചില്‍ വച്ച് വനിതാ കോണ്‍സ്റ്റബിള്‍മാര്‍ ഡ്രൈവിങ് പരിശീലനം നടത്തുന്നത്.
പിങ്ക് പട്രോളിലെ വനിതാ എസ്.ഐയുടെ
നിര്‍ദേശ പ്രകാരം കാറിന് അനുവദിച്ച ഡ്രൈവറെ ഒഴിവാക്കിയാണ് ഈ സംഘത്തിലെ ചില വനിതാ കോണ്‍സ്റ്റബിള്‍മാരെ ഡ്രൈവിങ് പരിശീലിപ്പിക്കുന്നതെന്ന് പരാതി ഉയര്‍ന്നിട്ടുണ്ട്. ഇന്നലെ വൈകുന്നേരവും ധര്‍മടം ബീച്ചില്‍ പിങ്ക് പട്രോളിന് അനുവദിച്ച കാറില്‍ ഡ്രൈവിങ് പരിശീലനം നടന്നു. ദിവസങ്ങളായി വനിതാ കോണ്‍സ്റ്റബിള്‍മാര്‍ ഇവിടെ വന്ന് പരിശീലനം നേടുന്നതായി നാട്ടുകാരും സാക്ഷ്യപ്പെടുത്തുന്നു. ബീച്ചില്‍ വാഹന പരിശീലനം പൊലിസ് തന്നെ നിരോധിച്ചപ്പോഴാണ് പൊലിസിന് ഇതൊന്നും ബാധകമല്ലെന്ന രീതിയില്‍ ഡ്രൈവിങ പരിശീലനം നടക്കുന്നത്. കുട്ടികളുടെയും സ്ത്രീകളുടെയും സുരക്ഷക്കായ് എന്നും വിളിപ്പുറത്തെത്തേണ്ട പിങ്ക് പട്രോള്‍ പരിശീലന വാഹനമാക്കി മാറ്റിയതില്‍ പൊലിസില്‍ തന്നെ അമര്‍ഷം പുകയുകയാണ്. ഉന്നത പൊലിസ് ഉദ്യോഗസ്ഥര്‍ വര്‍ഷങ്ങളോളം ഉപയോഗിച്ച കാറാണ് പിങ്ക് പട്രോളിങ്ങിനു വേണ്ടി പെയിന്റടിച്ച് രംഗത്തിറക്കിയിരുന്നത്. ആയിരക്കണക്കിന് കിലോമീറ്റര്‍ ഓടിയ കാര്‍ അടുത്തിടെ ടയറും ലീഫും പൊട്ടി ഏറെ നാള്‍ കട്ടപ്പുറത്തുമായിരുന്നു. ഇത് ഇപ്പോള്‍ ഡ്രൈവിങ് പരിശീലനത്തിനു കൂടി ഉപയോഗിച്ചാല്‍ കാര്‍ വീണ്ടും കട്ടപ്പുറത്താകുമെന്ന കാര്യത്തില്‍ സംശയമില്ല.