ന്യൂഡല്‍ഹി: സി.പി.എം പ്രവര്‍ത്തകര്‍ പ്രതികളായ പെരിയ ഇരട്ടക്കൊലക്കേസ് സി.ബി.ഐക്ക് വിട്ടതിനെതിരായ സംസ്ഥാന സര്‍ക്കാറിന്റെ ഹരജി സുപ്രിംകോടതി തള്ളി. കേസ് രേഖകള്‍ എത്രയും വേഗം പൊലിസ് സി.ബി.ഐക്ക് കൈമാറണമെന്ന് ജസ്റ്റിസ് നാഗേശ്വര്‍ റാവു അധ്യക്ഷനായ ബെഞ്ച് നിര്‍ദേശിച്ചു. കേസന്വേഷണം നേരത്തെ തന്നെ ആരംഭിച്ചതാണെന്നും എഫ്.ഐ.ആര്‍ രജിസ്റ്റര്‍ ചെയ്തിരുന്നുവെന്നും സി.ബി.ഐ കോടതിയെ അറിയിച്ചിരുന്നു. അന്വേഷണത്തിന് സംസ്ഥാന സര്‍ക്കാരിന്റെ ഭാഗത്ത് നിന്ന് കാര്യമായ സഹകരണങ്ങള്‍ ലഭിക്കുന്നില്ലെന്നും കേസ് ഡയറി നല്‍കാന്‍ തയാറായില്ലെന്നും സി.ബി.ഐ സുപ്രിംകോടതിയില്‍ പറഞ്ഞു. 

ഇത് അംഗീകരിച്ചാണ് കേസ് അന്വേഷണം തുടരാന്‍ സി.ബി.ഐക്ക് അനുമതി നല്‍കിയത്. 

2019 ഫെബ്രുവരിയിലാണ് പെരിയയിലെ യൂത്ത് കോണ്‍ഗ്രസ് പ്രവര്‍ത്തകരായ കൃപേഷ്, ശരത് ലാല്‍ എന്നിവര്‍ കൊല്ലപ്പെട്ടത്. 

കേസില്‍ സി.ബി.ഐ അന്വേഷണം ആവശ്യപ്പെട്ട്, കൊല്ലപ്പെട്ട യുവാക്കളുടെ മാതാപിതാക്കള്‍ സമര്‍പ്പിച്ച ഹരജിയിലാണ് കേരളാ ഹൈക്കോടതി സി.ബി.ഐ അന്വേഷണത്തിന് ഉത്തരവിട്ടത്. അന്വേഷണത്തില്‍ വീഴ്ചകളുണ്ടെന്നു ചൂണ്ടിക്കാട്ടിയ കോടതി പൊലിസ് സമര്‍പ്പിച്ച കുറ്റപത്രം റദ്ദാക്കുകയും ചെയ്തിരുന്നു. ഇതിനെതിരേസര്‍ക്കാര്‍ സുപ്രിംകോടതിയെ സമീപിക്കുകയായിരുന്നു. കേസില്‍ ക്രൈംബ്രാഞ്ച് നേരത്തേ വിശദമായ അന്വേഷണം നടത്തി കുറ്റപത്രം സമര്‍പ്പിച്ചിരുന്നെന്നായിരുന്നു കേരള സര്‍ക്കാര്‍ വാദം. അതുകൊണ്ടുതന്നെ രണ്ടാമത് ഒരു അന്വേഷണം കേസില്‍ ആവശ്യമില്ലെന്നാണ് സംസ്ഥാന സര്‍ക്കാരിന് വേണ്ടി ഹാജരായ അഭിഭാഷകര്‍ കോടതിയില്‍ വാദിച്ചത്. ഇത് സുപ്രിംകോടതി തള്ളി.