ആലപ്പുഴ: നാട്ടുക്കാരുടെ ചിരകാല അഭിലാഷമായ ബൈപാസിന്റെ നിര്‍മാണ പ്രവര്‍ത്തനങ്ങള്‍ക്ക് വേഗം വര്‍ധിപ്പിക്കാന്‍ ഇന്നലെ രാമമൂര്‍ത്തിയും സംഘവും ഗര്‍ഡറുകളുമായെത്തി. ഏഴോളം വണ്ടികളിലായി 14 ഗര്‍ഡറുകളാണ് ആന്ധ്രയിലെ തെലുങ്കാനയില്‍നിന്നും ബൈപാസിലെ മേല്‍പാല നിര്‍മാണത്തിനായി കൊണ്ടുവന്നത്.
ഇനിയും പത്തോളം വണ്ടികള്‍ എത്താനുണ്ട്. 34 ഗര്‍ഡറുകളാണ് നിര്‍മാണത്തിന് ആവശ്യമായിട്ടുള്ളത്. ചൊവ്വാഴ്ച്ചയോടെ മുഴുവന്‍ ഗര്‍ഡറുകളും എത്തിച്ചേരുമെന്ന് ഇവയുമായി ആലപ്പുഴയിലെത്തിയ ലീഡര്‍ രാമമൂര്‍ത്തി പറഞ്ഞു. കഴിഞ്ഞ നാല് ദിനരാത്രങ്ങള്‍ തുടര്‍ച്ചയായി വാഹനം ഓടിച്ചാണ് മൂര്‍ത്തിയും സംഘവും ആലപ്പുഴയില്‍ എത്തിച്ചേര്‍ന്നത്. ഏകദേശം 40 അടി നീളത്തിലുള്ള ഗര്‍ഡറുകളാണ് എത്തിച്ചേര്‍ന്നിട്ടുള്ളത്. ഇതോടെ ഏറെനാളായി ആശങ്കയിലായിരുന്ന ബൈപാസ് നിര്‍മാണം ഗര്‍ഡറുകളുടെ വരവോടെ വേഗം കൂടി. 2017 ല്‍ ബൈപാസിന്റെ നിര്‍മാണം പൂര്‍ത്തീകരിക്കുമെന്നാണ് കെ.സി വേണുഗോപാല്‍ എം.പി അറിയിച്ചിരുന്നത്. എന്നാല്‍ മേല്‍പാല വിഷയത്തില്‍ വിവാദങ്ങള്‍ കത്തിയതോടെ നിര്‍മാണ പ്രവര്‍ത്തനങ്ങള്‍ മന്ദഗതിയിലായി. കേന്ദ്ര-സംസ്ഥാന സര്‍ക്കാരുകളുടെ 50-50 പദ്ധതി പ്രകാരമാണ് കഴിഞ്ഞ യു.പി.എ സര്‍ക്കാര്‍ ബൈപാസ് നിര്‍മാണത്തിന് അനുമതി നല്‍കിയിരുന്നത്. ഏഴ് കിലോമീറ്ററുകളോളം നീളം വരുന്ന ബൈസപാസിന്റെ നിര്‍മാണം ഉടന്‍ പൂര്‍ത്തീകരിക്കാന്‍ കഴിയുമെന്ന് എം.പി പ്രത്യാശ പ്രകടിപ്പിച്ചു.