വേങ്ങര: കടയില്‍ സാധനം വാങ്ങാനെത്തിയ യുവതിയെ മാനസിക രോഗി കുത്തിപ്പരിക്കേല്‍പ്പിച്ചു. നന്നമ്പ്ര ചീര്‍പ്പിങ്ങല്‍ കൊല്ലം തൊടിക അബ്ദുല്‍ മജീദിന്റെ മകള്‍ ഫാത്തിമ (25) നാണ് പരിക്കേറ്റത്.
ഊരകം കുന്നത്ത് പാറമ്മല്‍ ഫൈസല്‍ (35) ആണ് പ്രതി. ബുധനാഴ്ച രാവിലെ പത്തരയോടെയാണ് സംഭവം. ഊരകം കുറ്റാളൂര്‍ പരേതനായ മുജീബിന്റെ ഭാര്യയാണ് ഫാത്തിമ. ഭര്‍ത്താവ് മരണപ്പെട്ടതോടെ ഇവര്‍ നന്നമ്പ്രയിലുള്ള പിതാവിന്റെ വീട്ടിലാണ് താമസം. ബുധനാഴ്ച രാവിലെ ഇവര്‍ അടച്ചിട്ട വീട് തുറന്നു വൃത്തിയാക്കാനെത്തിയതായിരുന്നു.
അതിനിടയില്‍ കുറ്റാളൂരുള്ള കടയില്‍ സാധനം വാങ്ങിക്കാനെത്തിയ ഫാത്തിമയെ മാനസിക രോഗിയായ ഫൈസല്‍ കത്തികൊണ്ടു നെഞ്ചിനു പുറകില്‍ കുത്തുകയായിരുന്നു. ഗുരുതരമായി പരിക്കേറ്റ ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഫാത്തിമ അപകടനില തരണം ചെയ്തതായി വേങ്ങര പൊലിസ് അറിയിച്ചു.
എസ്.ഐ. കെ.അബ്ദുല്‍ ഹക്കീം, എ.എസ്.ഐ. അരുണ്‍ ഷാ, സി.പി.ഒ.മാരായ ഹഫീല്‍, ബൈജു എന്നിവര്‍ ചേര്‍ന്നു പ്രതിയെ പിടികൂടി. മലപ്പുറം സി.ഐ.പ്രേംജിത്ത് സംഭവസ്ഥലം സന്ദര്‍ശിച്ചു.