മഞ്ചേരി: എസ്.കെ.എസ്.എസ്.എഫ് ട്രെന്റ് സംസ്ഥാന സമിതിയുടെ ആഭിമുഖ്യത്തില്‍ നാളെ മഞ്ചേരിയില്‍ ആന്‍ഡമാന്‍ മലയാളി കോണ്‍ഫറന്‍സ് നടക്കും. മലബാര്‍ സമരത്തിന്റെ നൂറാം വാര്‍ഷികത്തിന്റെ ഭാഗമായി 2021 ല്‍ സംഘടന മലപ്പുറത്ത് നടത്തുന്ന മലബാര്‍ ഹിസ്റ്ററ്റി കോണ്‍ഗ്രസിന്റെ മുന്നോടിയായാണ് പരിപാടി സംഘടിപ്പിക്കുന്നത്. രാവിലെ 9.30ന് കച്ചേരിപ്പടി വുഡ്‌ബൈന്‍ ഓഡിറ്റോറിയത്തിലാണ് പരിപാടി.
സ്വാതന്ത്ര്യ സമര കാലത്ത് നാടുകടത്തപ്പെട്ടവരുടെ ആന്‍ഡമാനിലേയും കേരളത്തിലേയും പിന്‍മുറക്കാരാണ് പരിപാടിയില്‍ സംബന്ധിക്കുന്നത്. ചരിത്ര വിദ്യാര്‍ഥികള്‍ക്കും പൊതുജനങ്ങള്‍ക്കും പരിപാടിയില്‍ പങ്കെടുക്കാം. ആന്‍ഡമാനില്‍ നിന്ന് നൂറോളം പ്രതിനിധികള്‍ എത്തിച്ചേരും.
പ്രതിനിധി സംഗമം, ചരിത്ര സെമിനാര്‍, സാംസ്‌കാരിക സദസ്, വിദ്യാഭ്യാസ ചര്‍ച്ച, ചരിത്ര പ്രാധാന്യമുള്ള സ്ഥലങ്ങളിലൂടെയുള്ള സന്ദര്‍ശനം തുടങ്ങിയവ സമ്മേളനത്തിന്റെ ഭാഗമായി നടക്കും. ആന്‍ഡമാനില്‍ മലയാള ഭാഷാ പഠന സാധ്യതകളും ചര്‍ച്ച ചെയ്യും. ചര്‍ച്ചക്ക് മലയാളം മിഷന്‍ ഡയരക്ടര്‍ പ്രൊഫ. സാജു സൂസന്‍ ജോര്‍ജ് നേതൃത്വം നല്‍കും. മലബാര്‍ ഹിസ്റ്ററി കോണ്‍ഗ്രസ്സിന്റെ ഭാഗമായി മ്യൂസിയം, ഡോക്യുമെന്ററി, പുസ്തക പ്രസാധനം, റിസര്‍ച്ച് ഫെല്ലോഷിപ്പ്, പ്രാദേശിക ചരിത്ര രചന, സ്മാരക സംരക്ഷണം തുടങ്ങിയവയും നടക്കുന്നുണ്ട്.
ഡോ.കെ.കെ.എന്‍ കുറുപ്പ് ഉദ്ഘാടനം ചെയ്യും. എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ അധ്യക്ഷനാകും. വിവിധ സെഷനുകളിലായി കോഴിക്കോട് ഖാസി സയ്യിദ് അബ്ദുന്നാസിര്‍ ഹയ്യ് ശിഹാബ് തങ്ങള്‍, സി.വിജയന്‍ മടപ്പള്ളി, പി.കെ അബ്ദുല്‍ ഗഫൂര്‍ അല്‍ ഖാസിമി, ആന്‍ഡമാന്‍ ഖാസി സുലൈമാന്‍ ഫൈസി, സയ്യിദ് ഹാഷിറലി ശിഹാബ് തങ്ങള്‍, അനീസുദ്ദീന്‍ അഹ്മദ്, അഡ്വ. എം. ഉമര്‍ എം. എല്‍. എ, ആനമങ്ങാട് അബ്ദുറഹിമാന്‍ മുസ്‌ലിയാര്‍, ഷാഹുല്‍ ഹമീദ് മേല്‍മുറി, ഒ.എം.എസ് തങ്ങള്‍ മേലാറ്റൂര്‍, ഡോ.എം.പി മുജീബ് റഹ്മാന്‍, ഡോ.അമീന്‍ ദാസ് എന്നിവര്‍ സംബന്ധിക്കും.
വാര്‍ത്താസമ്മേളനത്തില്‍ എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തലൂര്‍, ട്രെന്റ് ഡയരക്ടര്‍ ഡോ.ടി അബ്ദുല്‍ മജീദ് കൊടക്കാട്,സി. ടി ജലീല്‍ മാസ്റ്റര്‍,ഉമറുല്‍ ഫാറൂഖ് ഫൈസി മണിമൂളി പങ്കെടുത്തു.