കുമ്പള: ബാങ്ക് ഉദ്യോഗസ്ഥരെന്ന വ്യാജേന ഫോണില്‍ വിളിച്ച് എ.ടി.എം കാര്‍ഡിന്റെ രഹസ്യകോഡ് നമ്പര്‍ കൈക്കലാക്കിയ ശേഷം സ്ത്രീയുടെ 33,000 രൂപ കവര്‍ന്നു. കുമ്പള കഞ്ചിക്കട്ട സ്വദേശി കിഷോറിന്റെ ഭാര്യ മാലതിയാണ് തട്ടിപ്പിനിരയായത്. വെസ്റ്റ് ബംഗാള്‍ എസ്.ബി.ഐയുടെ ഹെഡ് ഓഫിസില്‍ നിന്നാണു വിളിക്കുന്നതെന്നും എ.ടി.എം കാര്‍ഡില്‍ പിശകുകളുണ്ടെന്നും അതു തിരുത്താന്‍ കാര്‍ഡിന്റെ പിന്‍നമ്പര്‍ പറയണമെന്നും ആവശ്യപ്പെടുകയായിരുന്നു. ആദ്യം നമ്പര്‍ നല്‍കാന്‍ വിസമ്മതിച്ച ഇവരെ വീണ്ടും വീണ്ടും വിളിച്ചു വിശ്വസിപ്പിച്ചാണ് രഹസ്യകോഡ് നമ്പര്‍ കൈക്കലാക്കിയത്.
കോഡ് നമ്പര്‍ നല്‍കി പത്തു മിനുട്ട് കഴിഞ്ഞയുടന്‍ തന്നെ 19,000 രൂപ പിന്‍വലിച്ചതായി ഇവര്‍ക്ക് ഫോണ്‍ സന്ദേശം ലഭിച്ചു. പിന്നീട് അഞ്ചു മിനുട്ടിനുള്ളില്‍ 9,900 രൂപയും തൊട്ടടുത്ത മിനുട്ടില്‍ 4,000 രൂപയും പിന്‍വലിച്ചതായി സന്ദേശം ലഭിച്ചു. കബളിപ്പിക്കപ്പെട്ടതാണെന്നു ബോധ്യമായ മാലതി പൊലിസില്‍ പരാതി നല്‍കി.