കോഴിക്കോട്: കേരളത്തിന്റെ വിദ്യാഭ്യാസ മേഖലയില്‍ വിദ്യാര്‍ഥികള്‍ക്ക് പ്രാതിനിധ്യം ഉറപ്പാക്കാന്‍ പരിശ്രമിച്ച നേതാവാണ് മുന്‍ മുഖ്യമന്ത്രി സി.എച്ച് മുഹമ്മദ് കോയയെന്ന് മുന്‍ മുഖ്യമന്ത്രി ഉമ്മന്‍ചാണ്ടി അഭിപ്രായപ്പെട്ടു.
കെ.പി കേശവമേനോന്‍ ഹാളില്‍ സൗത്ത് മണ്ഡലം മുസ്‌ലിം യൂത്ത് ലീഗ് കമ്മിറ്റി സംഘടിപ്പിച്ച സി.എച്ച് അനുസ്മരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തന്റെ ഉത്തരവാദിത്തത്തിനപ്പുറം ജനകീയ പ്രശ്‌നങ്ങളില്‍ കൂടുതല്‍ ശ്രദ്ധചെലുത്താന്‍ അദ്ദേഹത്തിനു സാധിച്ചു.
അധികാരത്തിനപ്പുറം എല്ലാ സമുദായവും സംഘടനയും അംഗീകരിച്ച നേതാവാണ് സി.എച്ച്. വിദ്യാഭ്യാസ മേഖലയില്‍ പിന്നോക്കാവസ്ഥയിലായിരുന്ന മലപ്പുറം ജില്ലയെ ഈ മേഖലയില്‍ ഒന്നാമതെത്തിച്ചതില്‍ സി.എച്ചിന്റെ സംഭാവന വലുതാണ്. രാഷ്ട്രീയത്തിനതീതമായി പ്രതിപക്ഷ ബഹുമാനം കാത്തുസൂക്ഷിക്കുന്നത് സി.എച്ചിന്റെ പ്രത്യേകതയാണ്. അദ്ദേഹത്തിന്റെ മഹാമനസ്‌കതയും മനുഷ്യസ്‌നേഹവുമാണ് ഇന്നും ജനങ്ങള്‍ സി.എച്ചിനെ ഓര്‍ക്കുന്നതിന്റെ പ്രധാന കാരണമെന്നും ഉമ്മന്‍ചാണ്ടി പറഞ്ഞു.
പ്രതിപക്ഷ ഉപനേതാവ് ഡോ. എം.കെ മുനീര്‍, പാണക്കാട് മുനവ്വറലി ശിഹാബ് തങ്ങള്‍, കെ.എം ഷാജി എം.എല്‍.എ, അഡ്വ. പി.കെ ഫിറോസ്, അഡ്വ. ടി. സിദ്ദീഖ്, കെ.സി അബു, വി.വി മുഹമ്മദലി, സാജിദ് നടുവണ്ണൂര്‍, റാഫി മുഖദാര്‍ സംസാരിച്ചു. സൗത്ത് മണ്ഡലം യൂത്ത് ലീഗ് പ്രസിഡന്റ് യു. സജീര്‍ അധ്യക്ഷനായി. മന്‍സൂര്‍ മാങ്കാവ് സ്വാഗതവും കെ. ഹംസക്കോയ നന്ദിയും പറഞ്ഞു.